रामेछाप २२ भदौ ।
गौरा पर्वको अवसर पारेर रामेछापको खाँडादेवीमा भेला भएका सुदूरपश्चिमेलीहरुले रामेछाप समाजको तदर्थ समिति समेत गठन गरेका छन् । भेलाले रामेछाप जिल्लाका शैक्षिक अगुवा, शिक्षाविद् एवं दार्चुलाको मालिकार्जुन गाउँपालिका घर भई लामो समय देखि रामेछापको शिक्षण पेसामा रहँदै आउनु भएका चन्द्र सिंह धामीको संयोजकत्वमा १३ सदस्यीय तदर्थ समिति पनि गठन गरेको छ । त्यसैगरि भेलाले ७ सदस्यीय सल्लाहकार समिति समेत गठन गरेको छ । भेलाले तदर्थ समिति मार्फत आर्थिक कोष गठन गर्ने र उक्त कोषलाई संस्थागत गर्ने समेत निर्णय गरेको छ ।
सोही अवसर पारेर गौरा पर्व र देउडा नाचको बारेमा खासै प्रभाव नरहेको रामेछाप जिल्लामा यस वर्ष देउडा नाचको पनि प्रदर्शन गरियो ।
यस अघि सुदूरपश्चिमाहरुको कम उपस्थितिका कारण यस खालका औपचारिक कार्यक्रम नहुने गरेको रामेछापमा यस वर्ष भने औपचारिक रूपमा गौरा पर्व पनि मनाइयो र देउडा नाच पनि नाचियो । सुदुरुपश्चिमको विभिन्न जिल्लामा भएर कर्मथलो रामेछाप बनाई विभिन्न पेसा व्यवसायमा संलग्न सुदूरपश्चिमेलीहरूले रामेछापको खाँडादेवी मन्दिर लगायत विभिन्न ठाउँमा भेला भएर जिल्लामा पहिलो पटक गौरा पर्व मनाएका हुन् ।
३० वर्ष अघि शिक्षण पेसाको रूपमा रामेछाप आउनु भएका मन्थली माविका सहायक प्राचार्य चन्द्रसिंह धामीको अगुवाइमा केन्द्रीकृत भएका करिब डेढ सय सुदूरपश्चिमेलीहरुले आफ्नो लोकप्रिय र मौलिक
पर्व गौरामा सहभागी भएर सुदूरपश्चिमकै झझल्को आउने गरी गौरा पर्व मनाए । रामेछाप जिल्लाको विभिन्न ठाउँमा रहेर विभिन्न पेसामा संलग्न रहेका करिब डेढ सय जनाले एकै ठाउँमा भेला भएर कार्यक्रम उल्लास पूर्वक तरिकाले मनाएका थिए ।
आम सहभागितामा मनाइएको गौरा पर्वले रामेछापलाई कर्मथलो बनाउँदै ‘जन्मथलो जान नपाएकाहरूलाई पनि कर्मथलोमै पुगेर गौरा मनाएको अनुभूति हुने तरिकाले पर्व मनाएका थिए । आफ्नो संस्कृतिलाई संरक्षण गर्नुका साथै सुदूरपश्चिमेलीहरूको संस्कृतिलाई रामिछापेली हरू सँग समेत सम्बन्ध जोडेर यसले भाइचाराको सम्बन्ध कायम राख्नुका साथै कर्मथलोमा आपसी सद्भाव कायम गर्न पनि सहयोग पुर्याउने भएकोले पनि यस वर्षबाट आफूहरूले गौरा पर्व र देउडा संस्कृतिलाई पनि आरम्भ गरेको’सुदूरपश्चिमेलीहरुका अगुवा चन्द्र सिंह धमिले बताउनु भयो ।
करिब डेढ सयको सङ्ख्यामा भेला भएका सुदूरपश्चिमेलीहरुले गौराको अवसरमा देउडा खेल समेत खेलेका थिए । सो अवसरमा रामेछापको मन्थली नगरपालिका ,रामेछाप नगरपालिका ,लिखु गाउँपालिका,गोकुल गङ्गा र उमाकुकुन्ड गाउँपालिकामा कार्यरत कर्मचारी तथा शिक्षकहरूको सहभागिता रहेको थियो ।
यो बारेमा तपाईको प्रतिकृया