रामेछाप २७ असोज – कृषि ज्ञान केन्द्र रामेछापले शुक्रवार सदरमुकाम मन्थलीमा सार्वजनिक सुनुवाइ कार्यक्रमको आयोजना गरी गत आवको प्रगति समीक्षा गरेको छ । केन्द्र मार्फत अघिल्लो आवमा भए गरेका काम र योजनाका अवस्था प्रति कृषक र सरोकारवालाहरूको कुनै गुनासा भए सुनुवाइ गर्ने र आर्थिक वर्ष २०८० –८१ को कार्यक्रम सार्वजनिक गर्ने उद्देश्यले केन्द्रले जिल्लाका सरोकारवालाहरू समेतलाई राखेर शुक्रवार उक्त कार्यक्रमको आयोजना गरेको हो ।उत्पादन गरेको कृषि उत्पादनहरू खरिद गर्नेलाई प्रोत्साहन रकम प्रदान गर्ने भएको छ ।
ज्ञान केन्द्रले शुक्रवार मन्थलीमा आयोजना गरेको सार्वजनिक सुनुवाइ कार्यक्रममा ज्ञान केन्द्र रामेछापका प्रमुख मीन बहादुर पुनले दुवै कार्यक्रमका बारेमा जानकारी गराउनु भएको थियो । सो क्रममा रामेछापका किसानले उत्पादन गरेको कृषि उत्पादनलाई खरिद गरेर यस वर्ष देखि बजार व्यवस्थापन गर्नका लागि पनि केन्द्रले प्रोत्साहन गर्नका लागि निश्चित रकमको पनि व्यवस्था गरिएको पनि प्रमुख पुनले बताउनु भयो । त्यसैगरि कार्यक्रममा कृषि क्षेत्रमा आएका कार्यक्रम, अनुदान र कृषकले सेवा प्राप्त गर्ने प्रक्रियाका बारेमामा पनि प्रमुख पुनले आफ्नो प्रस्तुतीकरण मार्फत जानकारी गराउनु भएको थियो ।
सो अवसरमा जिल्ला समन्वय समितिकी प्रमुख चिना खड्काले राज्यले कतिपय ठाउँमा दिएको अनुदानको दुरुपयोग भएको भन्दै आगामी दिनमा यस खालका गतिविधिलाई रोक्न सक्नु पर्ने बताउनु भएको छ । उहाँले राज्यले गरेको लगानी खेर जान दिनु हुँदैन त्यसैले गुनासो आउन नदिने गरी काम गर्न पनि कार्यालयलाई आग्रह गर्नु भयो ।
कार्यक्रमका अवसरमा सहभागीहरूले यस अघि कतिपय ठाउँमा सरकारी अनुदानको रकम दुरुपयोग भएको ,स्थानीय , प्रदेश र सङ्घको कार्यक्रम एकै किसिमको भएका कारण डुब्लिकेसन हुने गरेको जस्ता गुनासाहरू पनि सार्वजनिक सुनुवाइका क्रममा गरेका थिए । त्यस्तै कृषि अनुदान दिँदा वास्तविक किसान पहिचान गरेर दिनु पर्ने अनुदान लिएकाले कार्यक्रम प्रभावकारी भए नभएको भनी कडा निगरानी राख्नु पर्ने र अनुदान लिएर दुरुपयोग गर्ने र प्रभावकारी कार्यान्वयन नगर्नेलाई पुनः अनुदान प्रदान गर्न नहुने लगायतका सुझाव पनि आएको थियो ।
सो अवसरमा प्रमुख पुनले कृषि ज्ञान केन्द्र रामेछापमा यस वर्ष चालुतर्फ ९ करोड ६४ लाख र पुँजीगत तर्फ ५ लाख ५० हजार गरी कुल बजेट ९ करोड ६९ लाख रुपैयाँ रहेको जानकारी पनि गराउनु भएको थियो । कार्यक्रमका अवसरमा सहायक प्रमुख जिल्ला अधिकारी लगायत सञ्चारकर्मी र जिल्लाका विभिन्न सरोकारवाला निकायका प्रमुख र तिनका प्रतिनिधिहरूको पनि सहभागिता रहेको थियो ।
यो बारेमा तपाईको प्रतिकृया