रामेछाप २९ असोज । जिल्लाको पुरानो सहकारी संस्था बेताली साकोसको कुल पुँजी २१ करोड २५ लाख ३ हजार ५ सय ८७ रुपैयाँ रहेको छ । उक्त साकोसले गत आवमा संस्थाको सबै खर्च कटाएर २१ लाख १४ हजार ५ सय १२ रुपैयाँ मुनाफा गर्न सफल भएको हो ।
सहकारीले आफनो २९ औ वार्षिक साधारण सभाको अवसर पारेर असोज २८ गते आइतबार सचिव र कोषाध्यक्षले प्रस्तुत गरेको आर्थिक तथा साङ्गठनिक प्रगति प्रतिवेदन मार्फत संस्थाले गरेको बार्षक गतिविधिका बारेमा पनि जानकारी गराएको हो ।
सभामा कोषाध्यक्षले प्रस्तुत गरेको अर्थिक प्रतिवेदनमा सहकारीले हाल सम्म गरेको मुनाफा र आर्थिक कारोबार सँगै ऋण लगानी र असुली र उठ्न बाँकी ऋण र त्यसको असुलीको बारेमा संस्थागत रूपमा भए गरेका प्रयासका बारेमा पनि उल्लेख गरिएको थियो ।
साकोस वार्षिक सभाको उद्घाटन गर्दे कार्यक्रमका प्रमुख अतिथि एवं गोकुल गङ्गा गाउँपालिकाका अध्यक्ष काजी बहादुर खड्काले सहकारीको संस्थागत विकासमा पालिका पनि सहयोग गर्न तयार रहेको बताउनु भयो । उहाँले सर्व साधारण र गाउँमा बसेर दुःख गरेर जम्मा गरेको रकमको सदुपयोग गर्न सञ्चालक समितिलाई सचेत भएर काम गर्न पनि आग्रह गर्नु भयो । पछिल्लो समयमा देशका कतिपय सहकारीका गतिविधिका कारण सर्व साधारणमा सहकारी र तीनका सञ्चालकहरू प्रति विश्वास घट्दै गएका घटनाहरूको स्मरण गराउँदै बेताली सहकारीका सञ्चालकहरूलाई नीति र विधिका आधारमा काम गर्न पनि आग्रह गर्नु भयो ।
साधारण सभामा विशेष अतिथिको रूपमा बोल्दै गोकुलगंगा गाउँपालिकाकी अध्यक्ष उषा काकिले जिल्लाको अग्रणी सहकारीको रूपमा दर्ज भएको बेताली साकोसका सबै काम पारदर्शी हुनु पर्नै भन्दै नियमनका लागि पालिकाले पनि लागि पर्ने धारणा राख्नु भयो ।
सो अवसरमा जिल्ला सहकारी सङ्घका अध्यक्ष हिमाल ढुङ्गेलले कतिपय सकारीकर्मिहरुको व्यवहारका कारण पछिल्लो समयमा सहकारी र तिनको नेतृत्वप्रति सर्व साधारणले कुरा उठाउने गरेको भन्दै नेतृत्वलाई ईमान्दार पूर्वक काम गर्न पनि आग्रह गर्नु भयो ।
अर्का अतिथि जिल्ला बचत तथा ऋण सहकारी संस्थाका जिल्ला अध्यक्ष जेएन दाहालले सञ्चालक र ऋणी शेयर सदस्य ईमान्दार भए संस्थामा समस्या नआउने भन्दै त्यस तर्फ दुवै पक्षलाई सजग भएर काम गर्न पनि आग्रह गर्नु भयो ।
संस्थाका अध्यक्ष दिलीप भण्डारीको अध्यक्षतामा भएको उक्त साधारण सभामा ज्येष्ठ शेयर सदस्य, असल बचतकर्ता,वाल बचतकर्ता र उत्कृष्ट काम गर्ने कर्मचारी समेतलाई प्रमुख अतिथि खड्काको हातबाट नगद र सम्मान पत्र प्रदान गरिएको थियो ।
कार्यक्रमका अवसरमा नेपाल पत्रकार महासङ्घका जिल्ला अध्यक्ष बद्री नयाँघरे,जिल्ला बचत तथा ऋण सहकारी संस्थाका उपाध्यक्ष नवीन केसी,नेफस्कुन फिल्ड कार्यालय रामेछापका प्रमुख सूर्य थापा लगायतका वक्ताहरूले पनि बेताली साकोसको पुरानो ईतिहाँसलाई जीवन्त बनाई राख्नका लागि सञ्चालकहरूलाई ईमान्दारीता र मेहनत पूर्वक लाग्न पनि आग्रह गरेका थिए ।
यो बारेमा तपाईको प्रतिकृया