रामेछाप १२ पुस । रामेछाप नगरपालिकाको नगर स्तरीय छैटौं राष्ट्रपति रनिङसिल्ड प्रतियोगिता २०८० आजबाट पुरानो सदरमुकाम रामेछाप बजारको टुँडिखेल मैदानमा सुरु भएको छ । उक्त प्रतियोगिताको उद्घाटन बागमती प्रदेशका सांसद तारानारायण श्रेष्ठले एक समारोहका बिच गर्नु भएको हो ।
सो कार्यक्रमलाई सम्बोधन गर्नु हुँदै सांसद श्रेष्ठले खेलकुदको विकास विना राष्ट्रको विकास सम्भव नभएकोले सरकारले खेलकुदको क्षेत्रमा लगानी गर्नु पर्ने धारणा राख्नु भयो । उहाँले खेलकुद विकासको गतिसङै शैक्षिक विकासको गतिलाई पनि उत्तिकै महत्वदिनु पर्ने भएकोले यसको सुधारका लागि नीतिगत रूपमा रहेका जटिलताहरू फुकाउनु आवश्यक रहेको र त्यसका लागि आफू पनि सक्रिय रूपमा लागि पर्ने प्रतिवदता व्यक्त गर्नू भयो ।
सो अवसरमा कार्यक्रमका विशिष्ट अतिथि समेत रहनु भएका बागमती प्रदेशका अर्का सांसद आनन्द कुमार श्रेष्ठले खेल मानव जीवनको महत्त्वपूर्ण अङ्ग रहेको भन्दै यसको थप विकासका लागि, लागि पर्न सरोकारवाला पक्षलाई आग्रह गर्नु भयो । उहाँले सबै स्थानीय सरकारको लगानी र इच्छा शक्तिले मात्र खेलकुदको विकासमा आशातीत सुधार हुन नसक्ने भन्दै यसका लागि आफू पनि लागि पर्ने धारणा राख्नु भयो ।
रामेछाप नगरपालिकाका प्रमुख लव श्री न्यौपानेले बजेटमा भएको पाबन्दीका कारण नगर पालिकाले चाहँदा चाहँदै पनि खेलकुद र नगरको सर्वाङ्गीण विकासको क्षेत्रमा सोचे जति काम गर्न नसकेको भन्दै त्यसका लागि प्रदेश सरकारका माननीयहरू मार्फत थप सहयोगका लागि लागि आग्रह गर्नु भयो । उहाँले भन्नु भयो– आफू निश्चित समयका लागि मात्र नगरको नेतृत्वमा आएकोले आफ्नो कार्यकालमा सके जति राम्रो काम गर्ने प्रयत्न गर्ने सोच आफूले बनाएको बताउनु भयो ।
उक्त कार्यक्रमा रामेछाप नगरपालीकाकी उप प्रमुख बाल कुमारी कार्कि थापा नगरपालीकाका प्रमुख प्रशासकिय अधिकृत मित्र प्रसाद घिमिरे र नेपाल पत्रकार महासंघ रामेछापका अध्यक्ष वद्री नयाँघरेले रामेछाप नगर स्तरीय छैटौँ राष्ट्रपति रनिङसिल्ड प्रतियोगिता मार्फत खेलकुदको गतिविधीलाई वडा स्तर सम्म विकास गर्न सके खेलकुदको संस्थागत विकासमा सहयोग पुग्ने धारणा राख्नु भयो ।
सो अवसरमा नगर भित्र रहेका ९ वटा वडाका ११वडा माध्यमिक विद्यालयका विद्यार्थी र शिक्षक र विद्यालय व्यवस्थापन समितिका पदाधिकारीहरूको समेत सहभागिता रहेको थियो ।खेलकुद आगामी शनिवार समापन गर्ने गरी कार्यक्रम तय भएको आयोजक पक्षले जनाएको छ ।
कार्यक्रमका अवसरमा सहभागी ११ विद्यालयहरूले प्रतियोगितात्मक मार्च पास गरेका थिए । मार्च पासमा मावि गौरीशङ्करले सहभागी विद्यालयहरू मध्य सर्वोत्कृष्टता हाँसिल गर्दे पुरस्कार र प्रमाण प्राप्त गरेको थियो भने शारदा संस्कृत मावि बावियाखर्कका विद्यार्थीहरूले कार्यक्रमको आरम्भमा स्वस्ति वाचन गरेका थिए ।
बिहीबार ,शुक्रवार र शनिवार गरी तीन दिन सम्म सञ्चालन गरिने उक्त प्रतियोगिताका विभिन्न ७ विधाका खेललाई समावेश गराइएको र त्यसको उचित व्यवस्थापनका लागि विभिन्न समिति र उप समिति निर्माण गरी जिम्मेवारी समेत निर्धारण गरी सकिएको रामेछाप नगर शिक्षा शाखाका प्रमुख नमराज प्रसाद बडुले जानकारी दिनुभयो ।
यो बारेमा तपाईको प्रतिकृया