रामेछाप १४ पुस । बिहीबार देखी रामेछापको टुँडिखेलमा सुरु भएको छैटौँ राष्ट्रपति रनिङ शिल्ड प्रतियोगिताको उपाधि गौरीशङ्कर माध्यमिक विद्यालय रामेछापले जितेको छ । मार्च पास देखिनै उत्कृष्ट पुरस्कार जित्न सफल भएको उक्त विद्यालयले खेलेको विभिन्न खेलमा ३३ स्वर्ण, २७ रजत र २५ कांस्य पदक प्राप्त गर्दे प्रतियोगिताको उपाधि जित्न सफल भएको हो ।
उक्त प्रतियोगितामा जनता मावि कोलन्जोरले १२ स्वर्ण, ८ रजत र ६ कांस्य पदक प्राप्त गरी द्धितिय स्थान लिन सफल भएको छ भने प्रतियोगितामा श्री मावि भँगेरीले ८ स्वर्ण, ११ रजत र २४ कांस्य पदक सहित तृतीय स्थान जित्न सफल भएको छ ।
“स्वास्थ्यका लागी खेलकुद,राष्ट्र लागी खेलकुद”भन्ने मूल नाराका साथ रामेछापको रामेछाप नगरपालिकामा बिहीबार देखी सुरु भएको छैटौँ राष्ट्रपति रनिङ शिल्ड प्रतियोगिताका विजयी विद्यालय र खेलाडीहरूलाई प्रतिनिधि सभा सांसद पूर्ण बहादुर तामाङ(कान्छाराम),जिल्ला समन्वय समितिका प्रमुख चिना खडका,रामेछाप नगरपालिकाका प्रमुख लबश्री न्यौपाने,उपप्रमुख बाल कुमारी कार्की र प्रमुख प्रशासकीय अधिकृत मित्र प्रसाद घिमिरेले शिल्ड, मेडल र प्रमाणपत्र प्रदान गर्नुभयो ।
नगर भित्रका १३ वटा माध्यमिक विद्यालयले सहभागिता जनाएको उक्त प्रतियोगितामा भलिबल, कबडी, एथ्लेटिक्स,छात्र÷छात्रा रिले दौड,तेक्वान्दो ,हाई जम्प, लङ जम्प, त्रीपलजम्प, ज्याभलिङ थ्रो, सट पुट लगायतका खेलहरू खेलाइएको थियो । उक्त प्रतियोगिता अन्तर्गत गत वर्ष भएको पाँचौँ राष्ट्रपति रनिङ शिल्ड प्रतियोगिताको उपाधि पनि घरेलु विद्यालय गौरीशङ्कर माध्यमिक विद्यालय रामेछापलेनै जितेको थियो ।
यो बारेमा तपाईको प्रतिकृया