रामेछाप, २२ पुस । आगामी पौष २६ गते देखि माघ ७ गते सम्म सदरमुकाम मन्थलीमा सञ्चालन हुन लागेको वृहत् महोत्सवको तयारीले मन्थली बजार बेहुलीझै सिङारिएको छ । रामेछाप उद्योग वाणिज्य संंघको आयोजनामा हुन लागेको उक्त महोत्सवको तयारी स्वरूप बजारका विभिन्न ठाउँमा स्वागत ढोका बनाउने देखि बजार क्षेत्रमा टाँगिएको स्वागत ब्यानर र तोरणले पुरै बजार बेहुलीझैँ सिँगारिएको हो ।
महोत्सवको तयारीलाई तीव्रताका साथ अगाडि बढाएको आयोजकले यसलाई मर्यादित र व्यवस्थित बनाउनका लागि महोत्सवको मूल मैदान सम्याउने र स्टल निर्माणको काम पनि सम्पन्न गरी सकेको छ । कार्यक्रमका लागि करिब ७० लाख रुपैयाँ खर्च हुने अनुमान गरेको आयोजकले त्यसका लागि पनि जिल्लाका सबै स्थानीय तह,जिल्ला स्थित राजनीतिक दल,आम सञ्चार माध्यम र सरकारी तथा गैर सरकारी सङ्घ संस्था सँग समेत समन्वय गर्ने कामलाई तीव्र बनाएको आयोजक संस्था रामेछाप उद्योग वाणिज्य सङ्घका अध्यक्ष नवीन थापा मगरले जानकारी दिनुभयो ।
“रामेछापको दिगो विकास र अर्थतन्त्रको आधार‘ कृषि, जलस्रोत, पर्यटन तथा उद्योगको पूर्वाधार ” भन्ने मूल नारालाई सार्थक बनाउने मूल उद्देश्यका साथ गर्न लागिएको महोत्सवमा जिल्लाका सबै स्थानीय निकायमा उत्पादन भएका मुख्य कृषिवालीको बजारीकरण र आन्तरिक तथा बाह्य क्षेत्रका पर्यटक हरूलाई समेत महोत्सवमा आउने वातावरण निर्माणका लागि पनि आवश्यक समन्वयका साथै तयारी भइरहेको र त्यसको लागि प्रचार प्रसारको क्रममा पनि सहयोग गर्न रामेछाप उद्योग वाणिज्य सङ्घका अध्यक्ष नवीन थापाले सबै आम सञ्चार माध्यम र जिल्लावासीहरूलाई आग्रह गर्नुभयो ।
११ दिन सम्म सञ्चालन हुने महोत्सवका लागि बाह्य र आन्तरिक गरी ५० हजार दर्शक भित्र्याउने लक्ष्य सहित छिमेकी तथा अन्य बाह्य जिल्लाहरूमा पनि खबर गरी सकिएको पनि अध्यक्ष थापाले जानकारी दिनुभयो ।
महोत्सवको आकर्षणलाई नागरिक मैत्री बनाएर स्टलमा राखिने जिल्लाको पहिचानका रूपमा रहेका उत्पादनहरू आलु, जुनार,सुन्तला, किवी, र ढाकाको कपडा र सामानहरूको बजारी करणमा पनि ध्यान पुर्याइने छ । ११ दिन चल्ने महोत्सवको अवलोकनका लागि जिल्ला भित्र र बाहिरका गरी करिब ५० लाख दर्शक भित्र्याउने लक्ष्यका साथ काम भइरहेको छ ।
महोत्सवले आर्थिक मन्दी र व्यवसायमा आएको गिरावटले सुस्ताएको मन्थली बजार चलायमान हुने समेत अपेक्षा आफूहरूले गरेको र त्यसको आकर्षणका रूपमा जिल्ला तथा राष्ट्रिय स्तरका कलाकारहरूको समेत बेजोड प्रस्तुति रहने छ । त्यसैगरी महोत्सव स्थलमा रोगटे पीङ, बाल उद्यान पार्क लगायत विभिन्न मनोरञ्जनको सामागि राख्ने तयारी पनि आयोजक पक्षले गरेको छ ।
गाउँमा उत्पादित कृषि उत्पादन र उद्यमीहरूको उत्पादनलाई महोत्सव स्थलमा राखेर बेच विखन तथा प्रदर्शनका लागि सहज वातावरण बनाउनुका साथै महोत्सवका क्रममा आउन सक्ने विभिन्न वाधा अड्चन र समस्यालाई सहजिकरण गर्नका लागि पनि आयोजकले विभिन्न उप समिति निर्माण गरी सोही अनुसारको जिम्मेवारी तोकी सकेको सङ्घका सचिव यज्ञ सुवेदीले जानकारी गराउनु भयो । उहाँले महोत्सवलाई साझा महोत्सवका रूपमा सफल बनाउन पनि सबै जिल्लावासीहरू सँग आग्रह गर्नुभयो ।
यो बारेमा तपाईको प्रतिकृया