रामेछाप अस्पतालमा देखिएको विवाद टुंगियोे

रामेछाप,२ असार । जिल्ला अस्पताल रामेछापका स्वास्थ्यकर्मीहरु विचको आपसि समझदारीमा टुंगिएको छ । केही दिन अघि अस्पतालका मेडिकल सुपरिटेण्डेन्ट र अस्पतालमा कार्यरत कर्मचारी बिचको विवाद वार्ता मार्फत सहमतिमा टुँगिएको हो ।

अस्पताल प्रशासनले शुक्रबार विज्ञप्ती मार्फत अस्पताल भित्र देखिएको विवाद मेलमिलापमा परिणत भएको जानकारी गराएको थियो । अस्पतालका मेसु अच्युत पौडेल द्धारा हस्तक्षरित विज्ञप्तिमा– यस बिषयमा बिहिबार अस्पतालमा बसेको सर्वपक्षिय बैठकमा ब्यापक छलफल भई विवाद समाधान भैसकेकोले विभिन्न पत्रपत्रिका,अनलाईन फेसबुक मार्फत पोष्ट भएको तथा प्रकाशन भएको समाचारहरु झुटो भएकाले त्यस तर्फ नलाग्न समेत अनुरोध गरिएको छ । अस्पताल प्रशासनले गरेको छलफलका आधारमा विभिन्न निर्णयहरु सहित विवाद समाधान भएको अस्पतालका मे.सु. अचुत पौडेलले जानकारी दिनुभयो ।
अस्पतालको नयाँ नेतृत्व संगै देखापरेका सानातिना समस्या तत्काल समाधान हुन नसक्दाको परिणाम र कर्मचारीहरुले पनि आफनो समस्याका वारेमा अस्पताल प्रमुख सँग खुलेर भन्न नसक्दा यो समस्या आएको डा.पौडेल बताउनु हुन्छ । आफु वाल रोग विशेषज्ञको रुपमा धेरै अस्पतालहरुमा काम गरेको भएपनि मेसुको जिम्मेवारी पहिलो पटक रामेछाप अस्पतालमा आएर सम्हाल्दाको अनुभवले पनि प्राविधिक समस्या देखा परेको हुन सक्ने पनि डा.पौडेलको भनाई रहेको छ ।

अस्पतालमा कार्यरत स्वास्थ्यकर्मी सहित कार्यालय सहयोगीहरुले मे.सु.डा.अचुत पौडेलले धेरै जसो कर्मचारीहरुलाई मानसिक तनाव दिने,एउटा काममा ब्यस्त भईरहेको वेला अर्को अनावश्यक काम दिने,वार्डमा राउन्ड लिन आउँदा स्टाफलाई अनावश्यक दुख दिने,कर्मचारीको आफनो पदभन्दा फरक किसिमको काम गर्न लगाउने,काम गरिरहेको समयमा ध्यान अन्यत्रै केन्द्रित हुने खालको काम दिने गरेको आरोप लगाएका थिए ।
अस्पतालमा कार्यरत ४० जना कर्मचारीहरुले बाग्मती प्रदेशको स्वास्थ्य मन्त्रालयलाई काम गर्ने वातावरण नभएको भन्दै समुहिक राजिनामाको पत्र पठाएका थिए । मे सु पौडेलले अब आईन्दा अस्पतालमा कुनै पनि समस्या र विवाद नआउने गरी काम गर्ने प्रतिबद्धता जनाउनुभयो । यस्ता सामान्य विवादहरु आएमा पनि आन्तरीक छलफलबाटै समाधान गरिने उहाँको भनाई छ । सबैसँग समन्वय र सहकार्य गरेर अस्पतालको विकासमा आफु अहोरात्र लागि पर्ने पनि अस्पताल प्रमुख पौडेलले बताउनुभयो