मन्थलीमा चोरी गर्ने खड्का प्रहरी नियन्त्रणमा

मन्थली ,७ भदौ । मन्थलीमा फ्रिजको कम्प्रेसर चोरी गर्ने एक जना पुरुषलाई प्रहरीले पक्राउ गरेको छ । विहिवार विहान जिल्ला सदरमुकामको मन्थली बजारमा रहेको प्रत्युस इन्टरप्राइजेजको फ्रिजको कम्प्रेसर चोरी गर्ने मन्थली नगरपालिका– ३ साविक ठेगाना भई हाल मन्थली–१ बस्ने हरी खड्कालाई प्रहरीले विहिवार रातिनै पक्राउ गरेको हो ।
पक्राउ परेका खड्काले विहिवार विहान करिब ३ः२८ बजेको समयमा कृषी बिकास बैंकबाट हाटेचौर तर्फ जाने बाटोमा रहेको प्रत्युस इन्टरप्राइजेजको स्टोरमा मर्मत गरेर राखेको १९० लिटरको कम्प्रेसर चोरी गरी घर लगेका थिए ।
सामान हराएपछि संचालक सुवेदीले प्रहरीमा जानकारी गराएर आफैले पनि त्यसको अनुसन्धान गर्नुभएको थियो । अनुसन्धानका क्रममा सामान चोरी गरेको सिसिटिभीमा देखिए अनुसार संचालक युवराज सुवेदीले खड्का दोषी हुन सक्ने आशंका गर्दे प्रहरीलाई जानकारी दिनुभएको थियो ।
उक्त सामान भदौ ६ गते बिहीवार चोरी भएको भनि साँझ ८ बजे तिर सूचना आएको र सो सूचनाका आधारमा अनुसन्धानका लागि प्रहरी कार्यालयबाट प्रहरी निरीक्षक कौशल न्यौपाने सहितको टोली खटिएको र सञ्चालक सुवेदी सहितको सहयोगमा विहिबार राती १०ः३० बजेको समयमा चोरी भएको समान सहित चोरी गर्ने ब्यक्ती पक्राउ परेको जिल्ला प्रहरी कार्यालय रामेछापले जनाएको छ । घटनाको बारेमा थप अनुसन्धान भइरहेको प्रहरीले जनाएको छ ।