धोवी (रामेछाप) ,२७ भदौ । आर्थिक वर्ष २०८०÷०८१ मा संचालन भएका विकास निर्माण तथा सार्वजनिक सेवा प्रवाहको प्रभावकारिताको विषयमा लिखुतामाकोशी गाँउपालिकाले सार्वजनिक सुनुवाई कार्यक्रम सम्पन्न गरेको छ ।
गाउँपालिकाले पालिका भित्रका राजनितिक दल र सबै सरोकारवाला हरु समेतको रोहवरमा आफ्ना सबै जन प्रतिनिधिहरुलाई मुख्य जवाफदेही बनाएर सार्वजनिक सुनुवाइ कार्यक्रम गरेको हो ।
कार्यक्रमका अवसरमा सहभागिहरुले पालिकाको दीर्घकालिन र अल्पकालिन विकासका काम , तीनको गुणस्तरीयताको अवस्था ,त्यसमा पालिकाले गरेको काम र खेल्नु पर्ने भूमिकाका बारेमा हाक्का हाक्की प्रश्न गरेका थिए ।
सो क्रममा उनीहरुले पालिकाको भवन निर्माणका लागि पालिकाको सिंगो वजेट त्यस तर्फनै लगाएकोले अन्य दीगो विकाका काममा अवरोध पुगेको भन्दै पालिकाको ध्यानाकर्षण गराएका थिए । सहभागीले विकास निर्माण तथा पूर्वाधारका विषयलाई प्राथमिकतामा राखेर काम गर्न अनुरोध गरेका थिए । उनीहरूले आफ्ना समस्या र पालिकाले गरेको काम बारे खुलेर प्रश्न गरेका थिए भने जन प्रतिनिधिले पनि उठेको प्रश्नको जवाफ दिएका थिए ।
सो अवसरमा जवाफ दिँदै गाउँपालिका अध्यक्ष केशव महतले नागरिकमा असिमित आबश्यकताहरु भएको र गाउँपालिकामा स्रोत र साधनको कमी भएका कारण चाहे जति विकास गर्न नसकेको बताउनुभयो । गाउँपालिकालाई समुन्नत बनाउन सामूहिक प्रयास आवश्यक रहेको समेत अध्यक्ष महतले बताउनुभयो । विकास निर्माण गर्न तथा समाज परिवर्तन गर्न गाउँपालिकाका नागरिक सबै मिल्नु पर्नेमा उहाँको जोड थियो । महतले यो क्षेत्र कृषीका लागि सम्भावित क्षेत्र भएकोले ब्यवसायिक कृषिमा लाग्न सबैलाई अनुरोध गर्नुभयो ।
मंगलबार भएको कार्यक्रममा गाउँपालिका अध्यक्ष केशव महत, उपाध्यक्ष दिपा पाख्रिन, प्रमुख प्रशासकिय अधिकृत धनेन्द्र भुजेल र वडा अध्यक्षहरू प्रमुख बक्ताका रुपमा सहभागि थिए । कार्यक्रममा नेपाल पत्रकार महासंघ रामेछापका अध्यक्ष सहित अन्य पत्रकारहरु, कार्यपालिका सदस्यहरू,राजनीतिक दलका प्रतिनिधिहरु र स्थानीयहरूको उल्लेख्य उपस्थिति थियो ।
कार्यक्रमको सहजिकरण गर्दै सान नेपालका अध्यक्ष उमँग मैनालीले नागरिक बाट उठेका कुरा र विषयलाई गम्भिर रुपमा लिएर पालिकाको सर्वाङ्गीण विकास संगै शुसासनमा टेवा पुर्याउन पनि सिंगो पालिकाको टिमलाई अनुरोध गर्नुभएको थियो ।
यो बारेमा तपाईको प्रतिकृया