३१ भदौ, २०७६
मन्थली- २०७२ सालको बिनासकारी भूकम्पबाट पूर्ण रुपमा क्षति भएका विद्यालयहरु धमाधम बन्न थालेका छन् । भूकम्प गएको केही समय पछि सुरु गरिएको विद्यालय पुनर्निर्माणको कार्य अहिले तिब्र रुपमा अगाडी बढीरहेको राष्ट्रिय पुनर्निर्माण प्राधिकरण जिल्ला आयोजना कार्यान्वयन ईकाई (शिक्षा) रामेछापको दाबी रहेको छ ।
बिनासकारी भूकम्पका कारण जिल्लामा तीन सय ९४ ओटा सामुदायिक विद्यालयमा पूर्ण रुपमा क्षति पुगेको थियो । जस मध्ये अहिले एक सया नौँ ओटा विद्यालयको निर्माण कार्य सम्पन्न भएको राष्ट्रिय पुनर्निर्माण प्राधिकरण जिल्ला आयोजना कार्यान्वयन ईकाई (शिक्षा) रामेछापका प्रमुख निर्मल घिमिरेले जानकारी गराउनुभयो । उहाँका अनुसार २७ ओटा विद्यालयको निर्माण सुनिश्चितता भइसकेको छ भने दुई सय २३ ओटा विद्यालय निर्माणाधिन अवस्थामा र ३५ ओटा विद्यालय निर्माण हुन बाँकी रहेका छन् ।
विभिन्न कारणले विद्यालय पुनर्निर्माणको कामलाई तत्काल अगाडी बढाउन नसके पनि काम सुरु भएको समय देखि विद्यार्थीको सुरक्षा र पठनपाठनलाई मध्यनजर गर्दै निर्माणको कामलाई चाँडो भन्दा चाँडो सक्ने गरी कार्यालय लागी परेको प्रमुख घिमिरेले बताउनुभयो । त्यस्तै यस अघि भारतीय सरकारको सहयोगमा बन्ने भनेका ९ ओटा विद्यालयको काममा केही ढिला भए चाँडै काम सुरु गर्ने गरी टेन्डर आहवनको काम अन्तिम चरणमा पुगेको घिमिरेले बताउनुभयो । बाँकी रहेका ३५ ओटा विद्यालय निर्माणको लागि जग्गा व्यवस्थापन र कम विद्यार्थी भएका विद्यालयलाई एकीकरण गरेर पुनर्निर्माणको गर्ने गरी सरोकारवाला निकाय र स्थानीय सरकारसँग समन्वय भइरहेको उहाँको भनाई छ ।
निर्माणाधिन विद्यालयको अनुगमन: गुणस्तरमा ध्यान दिन आग्रह
शर्मा–खानी जेभी काठमाण्डौले दोस्रो चरणमा निर्माण गरिरहेको विद्यालयको अनुगमन गर्दै प्रमुख जिल्ला अधिकारी लिला कुमारी केसी पाण्डेले निर्माण कार्यमा गुणस्तरलाइ कायम राख्न आग्रह गनुभएको छ । प्रजिअ केसी पाण्डेले विद्यार्थीको समस्यालाई ध्यानमा राखेर चाँडो भन्दा चाँडो विद्यालय निर्माणको काम सक्न निर्देशन समेत दिनुभएको छ ।
त्यसैगरी विद्यालय अनुगमनकै क्रममा नेकपा रामेछापका नेता आनन्द श्रेष्ठ र नेपाली काग्रेस रामेछापका सचिब लेख बहादुर कार्कीले भवन नभएकै कारण जिल्लामा विद्यार्थीहरुको पठानपाठनमा पुगेको समस्यालाई मध्यनजर गर्दै चाडो काम सक्नु पर्नेमा जोड दिएका छन् । उनीहरुले विद्यालय बने पछि त्यसलाई व्यवस्थापनमा स्थानीय सरकार, विद्यार्थी, शिक्षक र अभिभावक जिम्मेवार भए गुणस्तरीय शिक्षामा टेवा पुग्ने बताएका छन् । अनुमगनमा जिल्ला समन्वय अधिकारी राजेन्द्र कुमार केसी, प्रमुख कोष नियन्त्रक उमाकान्त आचार्य, प्रहरी प्रमुख प्रहरी नायब उपरिक्षक सन्तोष कुमार भट्टराई, मन्थली–१३ का वडाध्यक्ष राजेन्द्र चौहन, प्राविधिक, पत्रकार लगायतको टोली रहेको थियो ।
समय सिमा भन्दा अगाडी नै काम सम्पन्न हुन्छ : निर्माण कम्पनी
उता पहिलो चरणमा १९ ओटा विद्यालय निर्माणको जिम्मा लिई समयमै काम सम्पन्न गरेको शर्मा–खानी जेभी काठमाण्डौले दोस्रो चरणको काम पनि समय सिमा भन्दा अगाडी नै सक्ने दाबी गरेको छ । दोस्रो चरणमा १२ ओटा विद्यालय पुनर्निर्माणको जिम्मा लिएको शर्मा–खानी जेभी काठमाण्डौका प्रतिनिधि रामबाबु घिमिरेले कम्पनीले जिम्मा लिएका सबै काम समय सिमा भन्दा अगाडी नै सक्ने गरी काम भइरहेको बताउनुभयो । १८ महिनाको समय सिमा पाएको निर्माण कम्पनीले ८ महिनामा ६० प्रतिशत भन्दा बढी काम सम्पन्न भएकाले निर्धारित समय अगाडी नै काम सकिने प्रतिनिधि घिमिरेले दाबी गर्नुभयो ।
यो बारेमा तपाईको प्रतिकृया