सिलिन्डर भेटिएको हो तर, बम हैन’ प्रहरी प्रमुख भट्टराई

१० असार, २०७६

रामेछापको मन्थली बसपार्क नजिक सिलिन्डर बम भेटिएको भन्ने हल्ला सत्यता नभएको प्रहरीले बताएको छ । खाना पकाउने एल पी ग्याँस सहितको सिलिन्डरमा बाहिरबाट टायर राखेर आगो लगाएर छाडिएको अवस्थामा भेटिएको प्रहरी प्रमुख सन्तोष भट्टराईले दाबी गर्नुभयो । आगो लगाएर छाडिएको ग्याँस पड्किएको तर कुनै क्षति नभएको भट्टराईले बताउनुभयो । नेत्रविक्रम चन्द (विप्लव) समूह नेकपाले मंगलबार नेपाल बन्दको घोषणा गरेकै दिन उक्त सिलिन्डर भेटिनुमा विप्लव समूहले नै सिलिन्डरमा आगो लगाएर छाडेको हुन सक्ने आसंक गरिएको छ ।

यातायातका साधन पनि ठप्प

विप्लव समूह नेकपाले गरेको नेपाल बन्दका कारण सदरमुकाम मन्थली लगायतका जिल्लाभरीका विभिन्न ठाउँमा मंगलबार बिहानै देखि साविकको झैं यातायातका साधन चल्न सकेका छैनन् । कतिपय विद्यालयहरूले आज अप्रिय घटना हुन सक्ने भन्दै कक्षा सञ्चालन गर्न नसकिने बताएका छन् ।

आफ्ना सर्लाही जिल्ला इन्चार्ज कुमार पौडेलको हत्या गरिएको दाबी गर्दै विप्लव समूहले नेपाल बन्दको आह्वान गरेको हो ।