२६ बैशाख, २०७६
रामेछाप– भूमि व्यबस्था, सहकारी तथा गरिबी निवारण मन्त्री पद्माकुमारी अर्यालले २०४८ साल देखि नै सार्वजनिक जग्गा अतिक्रमण गरी व्यक्तीको नाममा बनाउनेलाई खोजेर कारबाही गर्न खोज्दा उल्टै गाली खानु परेको दुखेसो ब्यक्त गर्नु भएको छ ।
बिहिबार रामेछापको नापी कार्यालय भवनको उद्घाटन कार्यक्रममा बोल्दै मन्त्री अर्यालले प्रधानमन्त्री निबास रहेको बालुवाटारको जग्गा २०४८ सालमा कृष्णप्रसाद भट्टर्राइ प्रधानमन्त्री हुँदा देखि नै अतिक्रमण सुरु भएको र हाल आएर त्यसमा संलग्न व्यक्तिलाई पत्ता लगाई कारबाही गर्न खोज्दा समाज नै सरकार प्रति खनिएको बताउनुभएको हो ।
प्रधानमन्त्री निबासमा मात्रै नभएर देशै भरी अतिक्रमण गरी बिभिन्न व्यक्तिले कब्जामा लिएका जग्गा सरकारले खोजी गरिरहेको र त्यस्ता व्यक्ति भेटिए सरकारले कुनै पनि हालतमा कारबाहि गरेरै छोड्ने उहाँले प्रतिबद्धता व्यक्त गर्नुभयो ।
नापी तथा मालपोत कार्यालयमा सेवा लिन आउने सर्वसाधरणलाई सेवामा छिटो, छरितो र नागरिक मैत्री बनाउनु यो सरकारको लागि चुनौती रहेको र यस्ता चुनौतीलाई तोड्ने गरी सरकार लागेको पनि उहाँले बताउनु भयो ।
लेखापढि व्यवसायिहरुको कारण मालपोत र नापीमा आउने सेवाग्रहीहरुले सहज रुपमा सेवा लिन नसकेको कुरा स्मरण गर्दै मन्त्री अर्यालले सहयोग गर्न चहाने व्यवसायिहरुले कार्यालय परिसर बाहिरै बसेर सहयोग गरिदिन आग्रह समेत गर्नुभयो । आधुनिक प्रबिधिबाट जनतालाई सेवा दिने गरी काम गर्न सरकार लागि परेको बताउदै भूमि व्यवस्था मन्त्री अर्यालले देशैभरी नापी नक्सामा समस्या रहेकाले सबै ठाउँमा पुनःनापी गरी भू–उपयोगी नक्सा तयार गर्ने गरी तयारी भइरहेको बताउनुभयो ।
नापी विभागका महानिर्देशक प्रकाश जोसीको अध्यक्षतामा भएको कार्यक्रममा जिल्ला समन्वय समिति रामेछापका प्रमुख प्रेमबहादुर खड्का, मन्थली नगरपालिकाका प्रमुख रमेशकुमार बस्तेत र प्रमुख जिल्ला अधिकारी लिलाकुमारी के.सी. पाण्डेले जिल्लाको समग्र अबस्था र भुमि सम्बन्धि समस्याका बारेमा बोल्नु भएको थियो । थापा निर्माण सेवाले एक वर्ष अघि निर्माण गरेको उक्त भवन ४ करोड २ लाख ८६ हजारको लागतमा निर्माण भएको नापी कार्यालयका प्रमुख इश्वरी प्रसाद प्याकुरेलले जानकारी दिनुभयो ।
यो बारेमा तपाईको प्रतिकृया