रामेछाप,२३ जेठ । प्रधानमन्त्री कृषि आधुनिकीकरण परियोजना कार्यान्वयन इकाई रामेछापले मंगलावर फल कुहाउने औँसा किरा र सिट्रस ग्रिनिङ रोगको नियन्त्रण तथा ब्यवस्थापन सम्वन्धि सचेतनामुलक कार्यक्रम मन्थलीमा सम्पन्न भएको छ ।
“सुन्तला जात फलफुलको ब्यवसायीकरण र वजारीकरणको विस्तार, रामेछाप जिल्लको युवारोजगारी र आर्थिक बृद्धिको आधार”,भन्ने मूल नाराका साथ सम्पन्न गरिएको उक्त कार्यक्रम जिल्ला समन्वय समिति रामेछापका उपप्रमुख प्रेम बहादुर थापाको अध्यक्षतामा भएको थियो ।
प्रधानमन्त्री कृषि आधुनिकीकरण परियोजना, परियोजना कार्यान्वयन एकाइ मन्थलीले मन्थली र रामेछाप नगरपालिकाको जुनार जोन क्षेत्रमा जुनार कृषक,जनप्रतिनिधि सरोकारवाला निकायलाई लक्षित गरी कार्यक्रम आयोजना गरेको हो ।
कार्यक्रमका अवसरमा बोल्दै रामेछाप नगरपालिका प्रमुख लव श्री न्यौपानेले जुनार रामेछाप नगरपालिकाको धेरै कृषकहरूको रोजी रोटीसँग जोडिएकाले यसको खेती विस्तार गर्नुपर्छ भनेर नगरपालिका लागि परेको बताउनुभयो ।
उहाँले नगरपालिका भित्रका जुनार उत्पादन हुने क्षेत्रलाई जुनार जोनका रूपमा विकास गरी प्रधानमन्त्री कृषि आधुनिकीकरण परियोजना, परियोजना कार्यान्वयन एकाइ मन्थलीले काम गरिरहेको भएपनि त्यो पर्याप्त नभएको वताउनुभयो ।
जुनार जोन क्षेत्रमा परियोजनाले सञ्चालन गर्ने कार्यक्रमलाई अझै प्रभावकारी बनाउनका लागि स्थानीय जनप्रतिनिधिहरूसँग अझै समन्वय बढाउन आवश्यक रहेको उहाको भनाई छ ।
नगर प्रमुख न्यौपाने किसानको सम्मान र किसानले उत्पादन गरेको कृषि उपजहरूले उचित मूल्य अझै पाउन नसक्दा किसानहरू दिन प्रतिदिन निराश बन्दै गएको बताउनुभयो ।
कार्यक्रमका अध्यक्ष एबं जिल्ला समन्वय समितिका उपप्रमुख प्रेम सागर थापाले परियोजनाले जुनारमा लाग्ने औँसा किरा नियन्त्रणमा ठुलो भूमिका खेलेको बताउनुभयो । परियोजनाको कामलाई अझै प्रभावकारी बनाउनका लागि स्थानीय सरकार लगायत सरोकारवाला निकायका बिचमा अझै समन्वय आवश्यक रहेको पनि उहाँले बताउनुभयो ।
कार्यक्रममा परियोजना एकाइ मन्थली रामेछापका प्रमुख थिरलाल गैरेले रामेछाप जिल्लामा एक लाख २२ हजार १ सय ६ वटा राम्रो फल दिने जुनारको बोटमा फलेका वार्षिक १५ करोड रुपैयाँ भन्दा बढी मूल्यको जुनार अहिले निर्यात भइरहेको बताउनुभयो । उहाँले अहिले मन्थली नगरपालिका र रामेछाप नगरपालिका भित्रका धेरै नागरिकहरूको मुख्य आम्दानीको स्रोत जुनार रहेकाले यसको उत्पादन बढाउनका लागि परियोजनाले स्थानीय सरकारकारसँग आवश्यक समन्वय गरेर काम गरिरहेको बताउनुभयो ।
कार्यक्रममा सहभागी जुनार कृषकहरूले चार पाँच वर्ष अगाडी सम्म औँसा किराका कारण ९० प्रतिशत जुनारको फल झर्दा आफूहरू ठुलो मर्कामा परेको बताएका थिए । अहिले प्रोटिन वेट भन्ने औषधीको प्रयोग पछि जुनारमा लाग्ने औँसा किरा पूर्ण रूपमा नियन्त्रण नभए पनि कम क्षति भइरहेको उनीहरूको भनाइ छ । जुनार किसानका अनुसार अझै जुनार बगैँचाका २ प्रतिशत जुनार औँसा किराले क्षति गरिरहेको छ ।
कार्यक्रमका अवसरमा प्लान्ट क्वारेन्टाइन तथा विषादी व्यवस्थापन केन्द्र ललितपुरका वरिष्ठ बाली संरक्षण अधिकृत देवराज अधिकारीले अमिलो जातको फलफूलमा लाग्ने सिट्रस ग्रिनिङ रोग, सिट्रस सिल्ला कीराको पहिचान र व्यवस्थापनका बारेमा जानकारी गराउनुभएको थियो ।
परियोजनाले जिल्लाको बिभिन्न पालिकाहरुमा जुनारका अलावा वाख्रा जोन र आलु जोनको क्षेत्रमा पनि विभिन्न गतिविधिहरु सञ्चालन गर्दै आइरहेको छ ।
यो बारेमा तपाईको प्रतिकृया