रामेछाप १७ मंसिर । ३२ औ अन्तराष्ट्रिय अपाङ्ग दिवसका अवसर पारेर मन्थली नगरपालीकाले वडा नं १२ गेलुका २१ जना अपाङ्गता भएका ब्यक्तिहरुका लागि अपाङ्गता सम्बन्धि सचेतिकरण गर्नुका साथै उनिहरुलाई न्यानो कपडा उपलब्ध गराएको छ ।
१६ दिने लैङ्गीक हिँसा विरुद्धको अभियानलाई समन्वयी रुपमा अगाडि बढाएको उक्त नगरले आईतबार अपाङ्ग सचेतन सेवा केन्द्र रामेछाप संगको सहकार्यमा गेलुमा रहेका क वर्ग, ख वर्ग र ग वर्गका अपाङ्गता भएका ब्यक्ति हरुका लागि उक्त अभियानमा जोडेको हो ।
अभियानको अध्यक्षता गर्नु भएकि मन्थली नगरपालिकाकी उप प्रमुख ईश्वरी बस्नेतले सहभागि हरुलाई न्यानो कपडा स्वरुप एक एक थान कम्मल वितरण गर्नु भएको थियो । सो अवसरमा उहाँले सिमित बजेटको कारण पनि मन्थली नगरपालिकाले नगर भित्र रहेका अपाङ्गता भएका ब्यक्ति,जेष्ठ नागरिक,वाल वालिका र हिँसामा परेका महिलाहरुका लागि उल्लेखनिय रुपमा काम गर्दे आएको बताउनु भयो । नगरले भोली पनि आवश्यक परे राज्यको निति र विधि भित्र बसेर उनिहरुलाई जस्तोसुकै सहयोग गर्न पनि तयार रहेको पनि उप प्रमुखले प्रतिवद्धता ब्यक्त गर्नु भयो ।
सो अवसरमा सहभागिहरुलाई अपाङ्ग सचेतन सेवा केन्द्र रामेछापका अध्यक्ष वद्री नयाँघरेले सहभागिहरुलाई अपाङ्गता सम्बन्धि सचेतना र त्यस सम्बन्धि जोडिएका घटना विवरण त्यस संग जोडिएका विभिन्न कारण र उनिहरुको हक हित र अधिकार र कानूनी ब्यवस्थाका बारेमा सहजिकरण गर्नु भएको थियो । वडा कार्यालयमा गरिएको उक्त कार्यक्रममा मन्थली महिला विकास शाखाकी प्रमुख भगवती तामाङ्ग,कानूनी सहजकर्ता पर्मिला सुवेदी, वाहक वडा अध्यक्ष समेतको सहभागिता रहेको थियो ।
यो बारेमा तपाईको प्रतिकृया