मन्थली,१४ साउन । नेवारी समुदायको परम्परागत लाखेनाच मंगलवार देखि रामेछापको मन्थलीमा सुरु भएको छ ।
नेवाः खल र नेवाःदय दवु रामेछापको संयुक्त आयोजनामा नगपञ्चमी देखि श्री कृष्णजन्मास्टमी सम्म निकालिने यो नाच मन्थलीको नेवारी समुदायले भने विगत ५ वर्ष देखि निरन्तर रुपमा निकाल्दै आइरहेको छ ।
रामेछाप जिल्लाको मन्थली मात्र नभएर चिसापानी, भंगेरी, ठोसे लगाएतका स्थानहरुमा विगतका वर्षदेखिनै लाखेनाच प्रदर्शन गर्र्ने चलन छ ।
तर मन्थली वाहेकका ति स्थानहरुमा भने जनै पुर्णिमाको भोलिपल्ट गाइजात्रा पर्व देखि सुरु गरी कृष्णजन्माष्टमीको भोलिपल्ट लखे मारेपछि समापन गर्ने गरिएको मन्थली नगरपालिका वडा नं –८ का स्थानीय विजानवी श्रेष्ठले बताउनुभयो ।
“ नेवारी कला र संस्कृति हाम्रो पहिचान, कला र संस्कृति मार्फत पर्यटन प्रवद्र्धन हाम्रो अभियान” भन्ने मूल नाराका साथ आयोजना गरिएको उक्त कार्यक्रम अन्तर्गत लाखे नाच, धिमेवाजा प्रदर्शन,गाईजात्रा, विवाह जात्रा,रोपाई जात्रा लगाएतका नेवारी कला र सस्कृतिका विभिन्न कार्यक्रमहरु प्रदर्शन गरिने नेवाः दया दवु रामेछापका कोषाध्यक्ष प्रमोद श्रेष्ठले जानकारी दिनुभयो ।
सुरुवातिको चरणमा यस्तो कार्यक्रम सञ्चालन गर्न निक्कै चुनौति खेप्नु परेको भएपनि पछिल्लो समयमा आएर आफ्नो समुदायको अस्तित्व रक्षा गर्न आफ्नो नेवारी समुदायका मानिसहरु एकजुट भएकाले कार्यक्रम सञ्चालन गर्न सहज बन्दै गएको नभएको नेवाः खल रामेछापका अध्यक्ष शेखर मान श्रेष्ठले राससलाई बताउनुभयो ।
उहाले भन्नुभयो– “हरेक बर्ष यो सिजनमा आबश्यकता र माग अनुसार हामी हाम्रो कार्यक्रम मन्थली बजारका विभिन्न भागहरु, छिमेकी जिल्ला दोलखा , सिन्धुली लगाएतका ठाउहरुमा गएर प्रदर्शन गर्ने गरेका छौ । ”
सो अवसरमा नेवारी समुदायका विभिन्न नाचहरु, लाखे नाच हनुमान नाच, कृष्ण चरित्र , ह्रासलिला लगाएतका कार्यक्रमहरु प्रदर्शन गरिने आयोजक संस्थाले जनाएको छ ।
कला र संस्कृति जोगाउन स्थानीय सरकारले पनि नेवारी समुदायका लागि आबश्यक वाद्यबादनका सामग्रीहरु सहयोग गरेको मन्थली नगर प्रमुख लव श्रेष्ठले बताउनुभयो ।
हिजोआज नाच हेर्न मन्थली बजारमा स्थानीको भिड लाग्ने गरेको छ ।
यो बारेमा तपाईको प्रतिकृया