रामेछाप,१९ चैत । गौरीशंकर बहुमुखी क्याम्पस रामेछापका नव निर्वाचित अध्यक्ष सन्देश घिमिरेले आगामी तीनका बर्ष भित्रमा क्याम्पसको भवन बनाउने बताउनु भएको छ । सो कुरा उहाँले आईतबार मन्थलीमा पत्रकार हरुसंगको भेटघाट कार्यक्रमका असवसमा बताउनु भएको हो ।
शनिवार गौरीशंकरको क्याम्पस सभाबाट निर्विरोध रुपमा अध्यक्ष बन्नुभएका घिमिरेले निर्वाचित सञ्चालक समिति र त्यसको अध्यक्षको हैसियतले बैठकको निर्णय र आपसी सहमतिका आधारमा क्याम्पसको शैक्षिक उन्नयन संगै भवन निर्माणको कार्यलाई आफुले पहिलो प्राथमिकतामा राखेर काम गर्ने प्रतिवद्धता ब्यक्त गर्नुभयो ।
घिमिरेले त्यसका लागि आफुले तत्काल कार्ययोजना बनाएर काम गर्ने सोचाई बनाई सकेको बताउनु भयो । उहाले भन्नुभयो– “जिल्लाकै पहिलो र पुरानो क्याम्पसका रुपमा चिनिएको रामेछापको क्याम्पस बर्षौ देखि संचालन हुँदै आएको भएपनि क्याम्पस हाता भित्र अहिले पनि दर्जनौं समस्या छन् । भवन सँगै शौचालय ,फर्निचर जस्ता मुख्य कुराको अभाव छ । विद्यार्थी संख्यामा कमी छ , क्याम्पसको पठन पाठनको गुणस्तर पनि सुधार गर्नुपर्ने छ । यी र यस्ता यावत चुनौतिका वाबजुद पनि आफुले कार्यकाललाई अबसरको रुपमा उपयोग गरी सबै खालको सुधारको प्रयासमा लाग्ने मेरो पहल हुनेछ ।”
भवन निर्माणको लागि सकेसम्म स्थानीय सरकार र सरोकारवालाहरु सँगको सहकार्यमा हाल क्याम्पस भएको क्षेत्रमानै जग्गाको ब्यवस्थापन गर्ने र त्यसो हुन नसकेमा वडा नं–७ को टावर डाँडामा रहेको क्याम्पसको जग्गालाईनै प्राथमिकतामा राखेर काम अघि बढाईने पनि घिमिरेले वताउनुभयो । “जग्गा र भवन व्यबस्थापनको कामलाई एकै साथ अघि बढाउने सोच बनाएको छु ”–घिमिरेले भन्नु भयो ।
नयाँ बन्ने भवनका लागि स्थानीय,प्रदेश र संघिय सरकार सँग समेत समन्वय गरेर काम गर्ने त्रिभुवन विश्व विद्यालयको भवन आचार संहिता र अन्य मापदण्डका आधारमा तयार गरिने,कार्ययोजनमा भवन निर्माण सँगै क्याम्पसको शैक्षिक प्रगतिको कामलाई पनि कार्ययोजनामा समावेस गराईने घिमिरेले बताउनु भयो ।
शनिवार क्याम्पस परिसरमा भएको क्याम्पस सभाले समितिको सदस्यमा क्रमशः लक्ष्मण कुमार घिमिरे कुमारी हायु र सरोज कटुवाललाई चयन गरेको छ । सभाको उद्घाटन रामेछाप नगरपालिकाका नगर प्रमुख लबश्री न्यौपानेले गर्नु भएको थियो । सो अबसरमा क्याम्पस प्रमुख मेघ प्रसाद भट्टराईले वार्षिक कार्यक्रम तथा बजेट,शैक्षिक प्रगति,आर्थिक प्रगति,भावि कार्यक्रम लगाएतका बिभिन्न बिषयवस्तुहरु प्रस्तुत गर्नुभएको थियो । कार्यक्रम तत्कालिन अध्यक्ष पुर्ण मगरको अध्यक्षतामा सम्पन्न भएको थियो भने क्याम्पस सञ्चालनका लागि अतुलनिय योगदान गर्ने सञ्चालक समितिका सदस्यहरुलाई सम्मान गरिएको थियो ।
यो बारेमा तपाईको प्रतिकृया