२ साउन, २०७६
रामेछाप– मन्थली–८ गाईखुरामा व्यवसायिक रुपमा पोखरीमा पालेका सबै माछा मरेका छन् । करिब एक रोपनी क्षेत्रफलको जग्गामा पोखरी निर्माण गरि माछा पालक किसान सानुबाबु पुरीले पालेका ७ सय माछा विहिबार मरे पछि करिब साँढे पाँच लाख बराबरको क्षति भएको छ ।
माछा पाल्नु अघि सबै अध्ययन गरिएको र विज्ञको सल्लाह बमोजिम कमन कार्प जातको माछा पाल्न उपयुक्त वातावरण देखिएकाले माछा पालेको भए पनि विना कारण एक्कासी माछा मर्दा अहिले आफूलाई करिब साँढे पाँच लाख नोक्सान भएको माछा पालक किसान सानुबाबु पुरीले बताउनुभयो ।
पोखरीमा विहान सम्म स्वस्थ अवस्थामा रहेका माछा दिउँसो एक्कासी मर्नुमा अरु केही कारण नभई कसैले विषादी हालिदिएको हुन सक्ने पीडित पुरीको आरोप छ । तीन दिन अघि पोखरीको आसपास हिड्दा मेटासिट नामाक विषादीको गन्ध आएको बताउँदै पीडित पुरीले माछा मर्ने खालको विषादी हालिदिएको हुन सक्ने दाबी गर्नुभयो ।
पोखरीमा रहेका सबै माछा मरे पछि जिल्ला प्रहरी कार्यालय रामेछाप र मन्थली नगरपालिकाको पशु शाखामा जानकारी गराइ प्रहरीले मुचुल्का समेत उठाएर लगेको पुरीले जानकारी दिनुभयो । माछा नमरेको भए दशै ताका विक्री गर्दा आफूलाइ करिब साँढे सात लाख आम्दानी हुने समेत पुरीले बताउनुभयो ।
पुरीले गाइखुरामा व्यक्तिगत लगानीमा कोशीको पानी डिप बोरिङ मार्फत तानेर विगत दुई वर्ष देखि करिब पाँच रोपनी क्षेत्रफलको जमिनमा पोखरी निर्माण गरी विभिन्न जातका माछा पाल्दै आउनुभएको छ ।
विहिबार एउटा पोखरीका सबै माछा मरे पनि अन्य दुई पोखरीमा रहेका माछा स्वस्थ रहेको उहाँको भनाई रहेको छ । उहाँले माछा पालनबाट बार्षिक करिब ६ लाख आम्दानी लिइरहनुभएको छ ।
यो बारेमा तपाईको प्रतिकृया