५ जेठ, २०७६
मन्थली– २०४५ सालमा रामेछापबाट मन्थली सरेर छोटो समयमा नै आफ्नो उच्च स्थान बनाउन सफल सदरमुकाम मन्थली बजारको पछिल्लो समयमा चहल पहलमा गिरावट आएको छ । मुलुक संघियताको कार्यान्वयनको चरणमा प्रवेश गरेसँगै सबै शक्ति स्थानीय तहमा केन्द्रित हुँदा सदरमुकाममा काम गर्न आउने मानिसको संख्या एक्कासी घटेपछि मन्थलीको चहल पहलमा गिरावट आएको हो ।
साँघुरो भूगोलमा फैलिएको मन्थली बजार क्षेत्रमा बनेका घरहरूमा अहिले बस्ने मानिसहरूको संख्या पनि घटेको छ । सरकारी कार्यालयका कर्मचारी र शिक्षकहरू पनि आफ्नो जागिरको सिलसिलामा जिल्ला छाडेर हिड्न थालीसकेका छन् । जिल्लामा संचालित गैर–सरकारी संघ संस्थाहरू पनि संघियताको कार्यान्वयन संगै गाउँ–गाउँमा पुगेका छन् ।
स्थानीय तहको शिक्षा शाखामा उप–सचिवको व्यवस्था भए पछि शिक्षा कार्यालयबाट हुने सबैजसो कामको भार पनि जिल्लामा घटेको छ । मानिसहरूको आगमन घटेसंगै सदरमुकाम मन्थलीका कार्यालहरूमा काम लिएर आउने नागरिकहरू समेत घटेका छन् । जसको असर मुख्यगरी मन्थलीमा होटल लगाएत अन्य व्यापरिक क्षेत्रमा पनि असर परेको अनुभव ब्यापारीहरूले गरेका छन् । संघियताको कार्यान्वयन पछि जिल्लामा भएका सरकारी कार्यालय अधिकासं स्थानीय तहबाट पनि संचालन भईरहेका छन् ।
जसका कारण सदरमुकाममा बनेका र बन्दै गरेका सरकारी कार्यालय बस्ने घरहरू पनि प्राय खाली जस्तै बनेका छन् । अहिले बन्दै गरेका र बनिसकेका कतिपय निजी घरहरू पनि भाडामा लाग्न सकेका छैनन् । सबै अधिकार र काम गर्ने कर्मचारी स्थानीय तहमा गएर सदरमुकामका कार्यालय खाली भए पनि स्थानीय तहका विषयगत शाखाका कार्यालयहरूमा आधा–आधी कर्मचारी पनि छैनन् । जसको कारण नागरिकको काम तामेलीमा रहँदा नागरिकहरूले विना कारण दुःख खेप्नु परेको छ । मानिसहरूको आगमन घटेसंगै मन्थलीको होटल र पसलवालाहरूको कारोवारमा समेत गिरावट आएको उनिहरूले गुनासो गर्ने गरेका छन् ।
विगतका वर्षहरूमा करौडोको ब्यापर हुने होटल व्यवसायमा पनि उल्लेख्य रूपमा गिरावट आएको रामेछाप उद्योग बाणिज्य संघ रामेछापका महासचिव जगन्नाथ दाहलले बताउनुभयो । उहाँका अनुसार मन्थलीको ब्यवसायलाई मथी उठाउनका लागि महासंघले सबैखालका प्रयासहरू जारी राखेको छ ।
यो बारेमा तपाईको प्रतिकृया