११ असार, २०७६
रामेछाप–रामेछाप नगरपालिकाले शिविर मार्फत गाउँमै पुगेर अपाङ्गता भएका व्यक्तिहरूलाई अपाङ्ग परिचयपत्र वितरण गरे पछि लामो समय देखि अपाङ्ग परिचयपत्रबाट बञ्चित सर्वसाधरणहरुले खुसी व्यक्त गरेका छन् ।
स्थानीय सरकार आए सँगै सिंहदरबारको अधिकार गाउँ–गाउँमा पुर्याउने संघियताको मर्मलाई सार्थक बनाउन नगरले आफ्ना सबै वडामा शिविर मार्फत अपाङ्ग परिचय पत्र बितरण कार्यलाई तिब्रता दिए पछि सेवाग्राहीमा खुसीयाली छाएको हो । परिचय पत्र समन्वय समितिको बैठकको निर्णय अनुसार जेठ २० गतेबाट शुरु गरिएको शिविर असार ९ गते सम्ममा आइपुग्दा नगरपालिकाका ६ वडाका १ सय १५ जना अपाङ्गता भएका व्यक्तिहरूले अपाङ्ग परिचयपत्र पाएका हुन् ।
पूर्ण रुपमा अशक्त भएकालाई घरमै पुगेर र आफ्नो वडा कार्यालय सम्म आउन सक्नेहरूलाई वडाबाटै परिचय पत्र वितरण गरिएको उप–सचिव शुकदेव नेपालले जानकारी दिनुभयो ।
पूर्ण अशक्त तथा अपाङ्गता भएका व्यक्तिहरूका लागि घर–घरमा पुगेर सेवा दिँदा उनीहरूमा उत्साह थपिएको रामेछाप–१ गोठगाउँका वडा अध्यक्ष नरबहादुर थापाले बताउनुभयो ।
शिविर मार्फत ‘क’ वर्गको ८ जनाले, ‘ख’ वर्गका २९ जनाले, ‘ग’ वर्गको २८ जनाले र ‘घ’ वर्गको २९ जनाले अपाङ्ग परिचयपत्र पाएको परिचय पत्र वितरण फाँटका प्रमुख नारायण सुवेदीले जानकारी दिनुभयो । उहाँका अनुसार बाँकी रहेका ५, ६ र ७ वडामा असार १३ गते सक्ने गरी काम भइरहेको छ ।
गाउँमै शिविर आउँदा आफूहरूलाई खुसी लागेको हिमगंगाका शारिरिक अपाङ्गता भएका प्रभुराम घिमिरेले बताउनुभयो । उहाँले भन्नुभयो– ‘हामीले गाउँमै सेवा पाउँला भनेर त कल्पना सम्म पनि गरेका थिएनौं, सेवा पायौं खुसि लागेको छ ।’
जिल्लाका ८ वटा स्थानीय तह मध्य अपाङ्गता भएका व्यक्तिहरूलाई लक्षित गरि घर दैलोमा शिविर मार्फत सेवा दिने रामेछाप नगरपालिका पहिलो बनेको छ ।
यो बारेमा तपाईको प्रतिकृया