एकै रातमा ७ घर चोरिदा प्रहरिलाई चुनौति

रामेछाप । सदरमुकाम मन्थली बजार संगै जोगिएको मच्छेडाँडी र सुनारपानी गाउँका ७ घर एकै रात चोरि भएपछि रामेछाप प्रहरिकालागि चुनौति थपिएको छ । आइतवार रातभरमा दुई गाउँका ७ वटा घरमा चोरी भएपछि प्रहरिलाई चोर पत्ता लगाउन चुनौति थपिएको हो ।मन्थली नगरपालिका वडा नं १ मच्छेडाँडी बस्ने टंक्रसाद सुबेदीको घरमा चोरी भएको छ । उनी परिवार सहित उपचारको लागि काठमाण्डौं गएको मौका छोपी चोरले उनको दुवै घरको ताल्चा फुटाएर घरभित्र रहेको करिव ७ तोला सुन, ३० हजार नगद लगाएतका सामाग्रीहरु चोरी गरेर लगेको पीडित टंक सुवेदीले बताएका छन् ।
त्यसैगरि सोही दिन मन्थली नगरपालिका वडा नं १ कै जिबेन्द्र प्रसाद घिमिरेको साईलि दिदीको घर समेत चोरी भएको छ । रातिको समयमा भएको हुनाले चोरको समुहले घर भित्र राखेको नगद २० हजार नगद समेत लगेको छ । त्यसैगरी चोरहरुले मन्थली नगरपालिका वडा नं ५ सुनारपानीमा ६ वटा घर चोरेका छन् । सुनारपानीमा व्यवसाय संचालन गर्दै आएका राजेन्द्र कार्कीको पसलवाट २ लाख नगद र पसलका सामानहरु चोरी भएको छ । त्यस्तै सोही वडाका सुमन कार्की र झम्क कार्की लगाएत ६ वटा घरहरुमा पसेको चोरहरुको समुहले नगद र सुन, चाँदीका गर गहना चोरी गरेपछि रामेछाप प्रहरिलाई अपराधि पत्ता लगाउनै पर्नै दबाव र चुनौति थपिएको छ ।
प्रहरीले अहिलेसम्म कुनै पनि चोर पक्राउ गर्न भने सकेको छैन् । सदरमुकाम मन्थली वरपर नै रहस्यमय तरिकाले चोरि हुन थालेपछि सर्वसाधारणमा त्रास फैलिएको छ ।दैनिक रुपमा चोरीका घटना बढ्दै गएपछि सरोकारवालाहरुले पनि चिन्ता ब्यक्त गरेका छन् ।

लगातार रुपमा चोरी भएपछि प्रहरीले पनि यस बिषयमा तदारुकताका साथ चोरीमा संलग्न अपराधीलाई प्रक्राउ गरेर सार्वजनिक गर्ने र पिडीतलाई उचित किसिमको क्षतिपूर्तिको तत्काल व्यवस्थापन गर्नुपर्ने स्थानिय पवन घिमिरेले बताए । 
केहि दिन अघि जिल्लाको गोकुलगंगा गाउँपालिकाको ठोसे, रस्नालु, नामाडी, बेताली र फर्पुमा समेत चोरीका घटनाहरु भएका थिए । प्रहरीले सुराकीको आधारमा चोरहरुलाई पक्राउ गरेको थियो चोरहरु अहिले थुनामा छन् । वाँकि चोरहरुको खोजी कार्य भइरहेको जिल्ला प्रहरी कार्यालय रामेछापका प्रमुख नबराज ढुंगानाले जानकारी दिए ।