उमाकुण्ड- रामेछापको उमाकुण्ड गाउँपालिकामा चालु आर्थिक वर्षको सात महिनामा पूँजीगत बजेट ११ प्रतिशत मात्रै खर्च भएको छ । पालिकाबाट प्रवाह भएका सार्वजनिक सेवा तथा विकास निर्माणको प्रभावकारीता विषयक सार्वजनिक सुनुवाईमा चालु आर्थिक वर्षको सात महिनमा भएको विकास निर्माणको तथ्यांक प्रस्तुत गर्दै प्रमुख प्रशासकीय अधिकृत इश्वरी सुवेदीले गत साउन देखि माघ २५ गते सम्ममा पूँजीगत बजेटको ११ दशमल ९८ प्रतिशत मात्रै खर्च भएको बताउनुभयो । त्यस्तै बितेको सात महिनामा चालु खर्च पनि १८ दशमलव १३ प्रतिशत मात्रै भएको छ ।
वडामा गएका केही योजनाहरु सम्पन्न भइसकेका तर भुक्तानी हुन बाँकी भएकाले रकम भुक्तानीपछि पूँजीगत खर्च बृद्धि हुने प्रमुख प्रशासकीय अधिकृत सुवेदीले बताउनुभयो । ७ वटा वडा भएको गाउँपालिकामा पचास लाख माथिका योजनाहरु पनि अधिकासं वडामा सम्झौता नभएको वडाध्यक्षहरुले बताएका छन् ।
सार्वजनिक सुनुवाईमा सहभागी भएका नागरिकले चालु आर्थिक वर्षमा काम गर्ने सयम थोरै बाँकी हुदाँ ११ दशमल ९८ प्रतिशत मात्रै खर्च हुँदा असार मसान्त सम्ममा सबै रकम खर्च नहुने होकी भन्दै चिन्ता व्यक्त गरेका छन् । सहभागीहरुले स्थानीय जनप्रतिनिधिलाई बाँकी रहेका योजनाहरु चाँडै सम्झौता गरेर काम सुरु नगरे वर्ष याममा काम गर्न नसकिने भएकाले चाँडो काम गर्न सुझाव दिएका छन् ।
सात महिनाको अवधिमा लक्ष्य भन्दा कम काम भएको भन्दै सार्वजनिक सुनुवाईका सहभागीले गुनासो गरेपछि गाउँपालिका अध्यक्ष शेरबहादुर सुनुवारले आर्थिक वर्षको अन्तिम सम्ममा विकास निर्माणका सबै काम गरिने बताउनुभयो । अध्यक्ष सुनुवारले वडाध्यक्षहरुलाई चाँडो सक्न निर्देशन दिँदै काम सम्पन्न गरी भुक्तानी दावी गर्न आग्रह समेत गर्नुभयो ।
त्यस्तै कार्यक्रममा बोल्दै गाउँपालिका उपाध्यक्ष उर्मिला कार्कीले काम सम्पन्न भएका योजनाहरुको अनुगमन गरी चाँडै भुक्तानीको लागि सिफारिस गरिने बताउनुभयो । उपाध्यक्ष कार्कीले आफ्नो गाउँमा आएका योजनाको काम के कती भएको छ भन्ने विषयमा स्थानीय नागरिकले पनि खोजी गर्नुपर्नेमा जोड दिनुभयो ।
उमाकुण्ड गाउँपालिकाको अयोजना तथा सान नेपालको सहजीकरणमा सोमबार भएको सार्वजनिक सुनुवाईमा सबै वडाका वडाध्यक्षहरुले आफ्नो वडा कार्यालयबाट प्रवाह भएका सार्वजनिक सेवा तथा विकास निर्माणको अवस्थाको बारेमा जानकारी गराएका थिए ।
यो बारेमा तपाईको प्रतिकृया