रामेछाप २८ साउन — आँखा पाक्ने रोगले सङ्क्रमणको सङ्क्रमणको रूप लिन थाले सँगै जिल्ला सदरमुकामका तीन विद्यालयले बिदा दिने निर्णय गरेका छन् । बजार गाउँ र विद्यालयमा पनि आँखाका रोगीहरू अत्याधिक रूपमा बढेपछि धेरै विद्यार्थी भएको मन्थली माविले एक साताका लागि पठनपाठन बन्द गर्ने निर्णय गरेको छ ।
उसले आइतबार अध्ययनका लागि विद्यालय पुगेका छात्रछात्राहरूलाई विद्यालय सञ्चालन भएको केही बेरमै बिदा दिइएको हो । उनीहरूलाई अर्को हप्ताको आइतबार मात्रै विद्यालय आउनका लागि सूचना गरेको विद्यालयका प्र अ टङ्कप्रसाद दाहालले बताउनु भयो ।
प्र अ दाहालका अनुसार विद्यालयका १ हजार ३ सयमध्ये ४ सयभन्दा धेरै छात्रछात्राहरू आँखा पाक्ने रोगबाट ग्रसित भएका छन् । आँखाको रोगबाट ९ जना शिक्षक पनि ग्रसित भएको प्र अ दाहालले बताए ।
त्यसै गरी सदरमुकाम मन्थलीमा रहेका ३ वटा निजी विद्यालयले पनि आँखाको सङ्क्रमणकै कारण तीन दिन बिदा दिने निर्णय गरेका छन् । प्राप्त सूचना अनुसार २९ गते सोमबारदेखि आगामी बुधवार सम्म तीन वटै निजी विद्यालय बन्द हुने भएकोले अविभाबकहरुलाई सचेत पूर्वक नानी बाबुहरूको ख्याल गर्न पनि ती विद्यालयले भनेका छन् ।
तामाकोसी आवासीय बोर्डिङ स्कुलमा अध्ययन गर्ने १ हजार १ सय विद्यार्थीमध्ये २ सय ५० जनाभन्दा धेरै बिरामी परेका छन् ।
केही दिनयता मन्थली र आसपासका क्षेत्रमा आँखा पाक्ने रोगको सङ्क्रमण तीव्र रूपमा फैलिएको छ । जिल्ला सामुदायिक आँखा केन्द्र रामेछापका अनुसार आँखा पाक्ने रोग लिएर केन्द्रमा दैनिक करिब १ सय जना बिरामीहरू आउन थालेका छन् । जबकि यसअघि दैनिक २० को हाराहारीमा मात्र आँखाका बिरामीहरू आउने गरेका थिए ।
आँखा पाक्ने रोगले जिल्ला अस्पताल, तामाकोसी अस्पताल, रामेछाप सामुदायिक आँखा अस्पताल र मन्थली अस्पतालमा बिरामी आउने क्रम बढेको छ । जिल्लामा रहेका चस्मा पसलमा पनि भिडभाड देखिन थालेको छ ।
सङ्क्रमण पूर्ण रूपमा निको हुन अरू एक साता लाग्ने अनुमान चिकित्सक हरूले गरेका छन् ।
यो बारेमा तपाईको प्रतिकृया