एमाले रामेछाप निर्वाचन समन्वय समिति संयोजकमा ढकाल र घिसिङ

रामेछाप । नेकपा एमाले रामेछापको बुधबार सम्पन्न जिल्ला कमिटी पदाधिकारीको पाँचौ बैठकले प्रदेशसभा सदस्य प्रत्येक्षतर्फका लागि निर्वाचन समन्वय समिति गठन गरेको छ । बैठकले प्रदेशसभा ‘क’ का लागि जिल्ला पार्टी उप–सचिव होतराज ढकाल र ‘ख’ का लागि जिल्ला कमिटी सदस्य मिलनकुमार घिसिङको संयोजकत्वमा कमिटी गठन गरेको हो ।
प्रदेशसभा ‘क’ अन्तर्गत समितिको सह–संयोजकमा आशबहादुर तामाङ र सचिवको जिम्मेवारी भोला खड्काले पाउनु भएको छ । त्यसैगरी प्रदेश ‘ख’ अन्तर्गत सह–संयोजकमा उज्वल सुवेदी र सचिवको जिम्मेवारी मखमली श्रेष्ठलाई दिइएको छ । समिति सदस्यहरुमा सम्बन्धित प्रदेश अन्तर्गत जिल्ला कमिटी सदस्यहरु, पालिका कमिटीका पदाधिकारीहरु तथा सबै वडा कमिटिका अध्यक्षहरु साथै वडा अध्यक्ष र प्रदेश अन्तर्गतका सम्पूर्ण जनप्रतिनिधिहरु रहेको पार्टी प्रचार विभाग प्रमुख प्रकाशकुमार कार्कीले जानकारी दिनुभयो ।
दुवै प्रदेशसभा निर्वाचन समन्वय समितिले पार्टी केन्द्रको निर्देशन तथा बागमती प्रदेशको परिपत्र २२ अनुसार आगामी मंसिर ४ गते हुने प्रतिनिधिसभा र प्रदेशसभा सदस्यका आकांक्षि उम्मेदवारहरुको नामावली तयार गरि जिल्ला कमिटीमा सिफारिस गर्ने छ ।
जसका लागि यही भदौ १९ गते बस्ने बैठकले प्रदेश सभा सदस्य प्रत्यक्षतर्फका आकांक्षिहरुको नाम सिफारिस गर्ने छ । त्यसैगरी भदौ २० गते बस्ने जिल्ला कमिटीको पूर्णबैठकले समानुपातिक र संघतर्फका आकांक्षिहरुको नामका बारेमा छलफल गरि बागमती प्रदेश कमिटीमा सिफारिस गर्ने पनि प्रचार विभाग प्रमुख कार्कीले जानकारी दिनुभयो । बैठक जिल्ला अध्यक्ष आनन्द श्रेष्ठको अध्यक्षता तथा केन्द्रीय सदस्य तथा जिल्ला इञ्चार्ज कैलाशप्रसाद ढुङ्गलको प्रमुख आतिथ्यता र बागमती प्रदेश कमिटीका सदस्यहरु क्रमशः शान्ति प्रसाद पौडल र तुलप्रसाद कँडेलको आतिथ्यतामा सम्पन्न भएको थियो ।