रामेछाप,२९ वैशाख । जिल्ला समन्वय समिति रामेछापले शुक्रवार लिखु तामाकोशी गाउँपालिका र पालिका मार्फत सञ्चालन भएका विभिन्न योजनाहरूको अनुगमन गरेको छ ।
जिसस प्रमुख चिना खड्का को नेतृत्वमा गएको टोलीले लिखु तामाकोशी मार्फत भए गरेका प्रशासनिक र पञ्जिकरणको काम पालिकामा हुनुपर्ने गुनासो पेटीका,नागरिक बडापत्र र सूचना अधिकारी राखे नराखेको बारेमा अनुगमन गरेको थियो । त्यसै गरी पालिकामा निर्माणाधीन १८ करोडको १५ शैयाको अस्पताल, ५० लाख को ऐरम्बास – काङ्वा – चिलाउने सडक, ५० लाखको डी –ताप्के सडक मर्मत र ५ करोडको तिल्पुङ –धोबी सडक कालोपत्रे लगायतका योजनाहरूको अनुगमन गरेको थियो ।
अनुगमनका क्रममा टोलीले पालिकामा तत्काल नागरिक बडापत्र राख्न, कार्यालयको सूचना अधिकारी तोकेर उहाँको नाम र सम्पर्क नं सहित को फ्लेक्स प्रिन्ट राख्न निर्देशन दिएको थियो ।
त्यसैगरी लुम्बिनी कल्पवृक्ष निर्माण व्यवसायीले सुरु गरेको १५ शैयाको अस्पताल को काम अत्यन्तै ढिलासुस्ती भएकोले तत्काल काम सुरु गर्नुपर्ने, ऐरम्बास – काङ्वा – चिलाउने सडक छेउमा नालीको व्यवस्था मिलाउनुपर्ने, मापदण्ड अनुसारको गुणस्तरको कमि देखिएकोले अनिवार्य रूपमा मापदण्ड अनुसारकै गुणस्तर कायम गरी आवश्यक काम गर्न डी–ताप्के सडक मर्मत गर्ने निर्माण व्यवसायी र तिल्पुङ–धोबी सडक कालोपत्रे गर्ने निर्माण व्यवसायीलाई अनुरोध गरिएको छ । यस अघि जिल्ला समन्वय समिति रामेछाप मार्फत विहिवार खाँडादेवी गाउँपालिकामा सञ्चालन भएका विभिन्न योजनाहरूको पनि अनुगमन गरिएको थियो ।
यो बारेमा तपाईको प्रतिकृया