मन्थली, जेष्ठ ३ । बुधवार बिहान परेको चट्याङले जिल्ला प्रशासन कार्यालय रामेछापका उपकरणहरूमा क्षति पुगेको छ । चट्याङले कार्यालयको कम्प्युटर र इन्टरनेटका उपकरणमा क्षति पुगेको हो । उपकरणमा क्षति पुगेपछि जिल्ला प्रशासनले दिने सेवा राहदानी सेवा पूर्ण रूपमा प्रभावित भएको छ ।
प्रशासन कार्यालयले इन्टरनेट, टेलिफोन, राउटर लगायतका उपकरण मर्मत गरेर सामान्य सेवा बुधवार दिउसो देखि सञ्चालनमा ल्याए पनि राहदानी सेवा अझै अवरुद्ध छ ।
राहदानी सिफारिस सेवा अर्को व्यवस्था नभएसम्मका लागि बन्द गरिएको सहायक प्रमुख जिल्ला अधिकारी अनोजकुमार घिमिरेले बताउनुभयो । डिभाइस राहदानी विभागमा पठाएकोले मर्मत भएर आएपछि मात्र सेवा सञ्चालनमा आउने घिमिरेले बताउनुभयो ।
उहाँका अनुसार– “राष्ट्रिय परिचयपत्रका लागि फोटो खिच्ने क्यामेरा लगायतका उपकरण र सिसी क्यामेरा समेत चट्याङले क्षति पुगेको छ । राष्ट्रिय परिचयपत्र र नागरिकता प्रमाणपत्रको सेवा सुरक्षित रहेको एक सेट उपकरणले सञ्चालनमा रहेको छ ।”
यो बारेमा तपाईको प्रतिकृया