मन्थली,१५ जेठ । राप्रपाले आफ्नो ३४ औँ स्थापना दिवस सोमवार मनाएको छ । जिल्ला अध्यक्ष भरत वाईवाको अध्यक्षतामा सम्पन्न उक्त कार्यक्रममा राष्ट्रिय प्रजातन्त्र पार्टी बागमती प्रदेशका अध्यक्ष विक्रम बहादुर थापाले पञ्चायत कालदेखि हाल सम्म उच्च ओहोदामा पुगेका सबैको छानविन हुनुपर्ने बताउनुभयो । उहाँले सरकारले कानुनी राज्यको उपहास गरेको भन्दै यस खालका हर्कत आफ्नो पार्टीका लागि मान्य नहुने बताउनुभयो ।
कार्यक्रमको प्रमुख अतिथिको रूपमा बोल्दै उहाँले पछिल्लो समयमा देशमा सार्वजनिक भएका सबै भ्रष्ट्राचारका काण्डहरूको निष्पक्ष रूपमा छानबिन हुनुपर्ने बताउनुभयो ।
उहाँले भ्रष्ट्राचार जस्तो आपराधिक कार्यमा संलग्न जो कोहीलाई कानुन दायरामा ल्याउनु पर्नेमा सरकारले रेसम चौधरी जस्तो आपराधिक घटनामा संलग्न व्यक्तिलाई आम माफी दिएर रिहाइ गरेर कानुनी राज्यको बर्खिलाप गरेको आरोप पनि लगाउनुभयो ।
उहाँले भन्नुभयो– म पनि पटक–पटक मन्त्री बनिसकेकाले भ्रष्ट्राचारको छानबिन आफूबाटै सुरु गर्न पनि सरकारलाई सुझाव दिनुभयो ।
उहाँले सर्वोच्च अदालतको आदेशको बलमिचाइँ गरेर चौधरीलाई आममाफी दिन सिफारिस गरे पनि यसमा राष्ट्रपतिले पनि आफ्नो अधिकारको दुरुपयोग गरेर गलत गरेको आरोप लगाउनु भयो । रेसम चौधरी प्रकरणमा हातहतियार बिना गएको एसपी सहित आधा दर्जन बढी सुरक्षाकर्मी र २ वर्षको दूधे बालकको बीभत्स हत्या भएको प्रमाणित घटनाको सत्य तथ्य नै नहेरी उनलाई आम माफी दिनु गलत भएको धारणा राख्नु भयो ।
कार्यक्रममा नेपाली काँग्रेसका जिल्ला उपसभापति लेख बहादुर कार्की,एमाले उप सचिव होतराज ढकाल,एकीकृत समाजवादीका सचिवालय सदस्य विकास पुलामी, लगायत राप्रपाका अन्य नेता तथा कार्यकर्ताहरूले पनि आ –आफ्नो मन्तव्य राखेका थिए ।
यो बारेमा तपाईको प्रतिकृया