रामेछाप,३१ जेठ । प्रेस चौतारी नेपाल रामेछापले आफ्नो १३ औँ वार्षिक साधारण सभा मंगलवार मन्थलीमा सम्पन्न गरेको छ । चौतारीले विभिन्न सात बुँदे मन्थली घोषणापत्र जारी गर्दै आफ्नो साधारण सभा सम्पन्न गरेको हो ।
प्रेस चौतारी नेपालका केन्द्रीय अध्यक्ष गणेश बस्नेतले साधारण सभाको उद्घाटन गर्दै नेपालको पत्रकारिताको ईतिहासमा प्रेस चौतारीले पुर्याएको योगदानको चर्चा गर्दै नेपाल पत्रकार महासंघले सुरु गरेको पत्रकार शुद्धिकरण अभियानलाई पनि आफनो संगठनले सफल पारेरै छाड्ने दावी गर्नुभयो ।
उहाँले एकै ब्यक्ती सरकारी जागिरे ,शिक्षक,राजनितिज्ञ र पत्रकार भएर काम गर्दा सम्बन्धित कार्य क्षेत्रमा काम चोर प्रवृत्ति हावी भएको भन्दै यसरी विकृत बनेको क्षेत्रलाई सदस्यता शुद्धिकरण अभियानले निस्तेज पार्ने धारणा राख्नुभयो ।
कार्यक्रमका प्रमुख अतिथि समेत रहनु भएका अध्यक्ष बस्नेतले अहिले नेपाल पत्रकार महासंघका केही जिल्ला शाखाहरुले सदस्यता शुद्धिकरणको नाममा एकलौटि गरेको सिफारीरले आफुलाई लज्जित बनाएको भन्दै यस खालका गतिविधिलाई सबै संगठनहरुको साझा प्रयासमा केन्द्रीय कार्य समितिले किनारा लगाउने दावी गर्नुभयो ।
संस्थाका जिल्ला अध्यक्ष नवराज श्रेष्ठको अध्यक्षतामा भएको बार्षिक साधारणसभामा नेकपा एमाले रामेछापका अध्यक्ष एवं बागमती प्रदेश सभा सदस्य आनन्दकुमार श्रेष्ठले प्रेस चौतारी नेपालले पत्रकारीता र परिवर्तनका क्षेत्रमा पुर्याएको योगदानको बारेमा चर्चा गर्नुभयो ।
मन्थली घोषणापत्र जारी गर्दै सम्पन्न भएको साधारण सभाले नेपाल पत्रकार महासंघको सदस्यता शुद्धीकरण अभियानलाई स्वागत गरेको छ । पत्रकार महासंघ सदस्यता शुद्धीकरण मापदण्ड–२०७९ अक्षरशः निर्मम ढङ्गले कार्यान्वयन गर्नुपर्ने लगाएतका मागहरु घोषणा पत्रमा समावेस गरिएका छन् ।
अनुगमन कार्यमा संलग्न नगराइएको प्रति आपत्ति जनाउँदै स्थानीय सरकारहरूलाई थप उत्तरदायी जिम्मेवार र पारदर्शी बन्नका लागि पनि सभाले माग गरेको छ । पत्रकारको न्यूनतम पारिश्रमिक बढ्ने चर्चा चल्ने बित्तिकै देशका ठूला भनिएका मिडिया हाउस तथा अन्य सञ्चार गृहले पत्रकारको रोजगारीमा कटौती गर्ने तथा थप काम थोपर्ने गरेको प्रति आपत्ति जनाउँदै यस्ता खालका गतिविधि तत्काल बन्द गर्नका लागि पनि सभाले सम्बन्धित निकायलाई सचेत गराएको छ ।
त्यसैगरी घोेषणा पत्रमा वर्षा याम सुरु भएसँगै बाढी, पहिरो, डुबान लगायतका विपद्का घटना बढ्दै जाने भएकाले तीनै तहका सरकारलाई यसको तयारी गरी जनताको रक्षा र सूचित गराउन पनि माग गरिएको छ ।
यो बारेमा तपाईको प्रतिकृया