ओख्रेनीमा पहिलो पटक सार्वजनिक सुनुवाई

रामेछाप,२ असार । रामेछाप नगरपालिका वडा नं ६ को ओख्रेनीले स्थानीय तहको निर्वाचन पछि पहिलोपटक सार्वजनिक सुनुवाई कार्यक्रम गरेको छ । वडाले नगर प्रमुखलाई प्रमुख अतिथि बनाएर चालु आर्थिक वर्ष २०७९÷८० मा वडा भित्रका विकास निर्माण र सेवा प्रवाहका बारेमा नागरिकहरुको रोहवरमा सार्वजनिक सुनुवाई गरेको हो ।

शनिबार सम्पन्न उक्त कार्यक्रममा वडाले प्रवाह गरिरहेको सेवा तथा विकास आयोजनाहरुको बारेमा वडाका सचिव प्रेम कुमारी पहाडीले जानकारी गराउनुभएको थियो । उहालले वडाले आ ब २०७९÷८० को ६७ लाख ३६ हजार ६ सय बजेटले सबै योजनाका कामहरु पुरा गरेको जानकारी गराउनुभयो । सो अबसरमा उहाले वडाले यो अवधिमा २ लाख ६६ हजार ५ सय ५१ रुपैँया राजश्व संकलन गरेको जानकारी पनि गराउनुभयो ।
सार्वजनिक सुनुवाई कार्यक्रमका प्रमुख अतिथि एवं रामेछाप नगरपालिकाका प्रमुख लबश्री न्यौपानेले नगर तथा वडाबाट भैरहेका विकास निर्माणका कामहरुमा सधैँभरी नागरिकहरुले खबरदारी गर्नुपर्ने बताउनुभयो । उहाले नागरिकहरुले खबरदारी गरेमा धेरै बिग्रन लागेका कामहरुमा समेत सुधार आएर शुसासनलाई टेवा पुग्ने पनि बताउनुभयो ।

उक्त कार्यक्रममा बोल्दै रामेछाप नगरपालिकाका उपप्रमुख बाल कुमारी कार्कीले सुशासन, पारदर्शिता र जवाफदेहिताका लागि संचालन गरिने सार्वजनिक सुनुवाइ कार्यक्रमलाई हरेक वर्ष निरन्तरता दिनका लागि आग्रह गर्नुभयो ।
रामेछाप नगरपालिकाका प्रबक्ता समिर कार्कीले नगरपालिकाले पछिल्लो समय धेरै राम्रा कामहरुको सुरुवात गरेको भन्दै नगरबाट भएका राम्रा र नराम्रा कामहरुको खबरदारी गर्न पनि उहाले सबैलाई आग्रह गर्नुभयो ।
सार्वजनिक सुनुवाई कार्यक्रममा नागरिकहरुले शिक्षा,स्वास्थ्य कृषि ,पशुपालन,सडक,खानेपानी लगायत विभिन्न विषयहरुमा रहेर प्रश्न,जिज्ञास र गुनासोहरु राखेका थिए । सहभागीहरुको प्रश्नको जवाफ वडा नं ६ का वडाअध्यक्ष राजेश तामाङले दिनुभएको थियो ।
तामाङले नागरिकहरुको प्रश्नको जवाफ दिदै सार्वजनिक सुनुवाई कार्यक्रममा मात्रै नभएर वडाबाट प्रवाह भैरहेको हरेक कामहरुमा नागरिकहरुले जति बेला र जुनसुकै समयमा पनि सुझाव दिएर वडाका काममा शुसान कायम गर्ने आफ्नोे अभियानमा सघाउन पनि आग्रह गर्नुभयो ।
कार्यक्रमका अबसरमा पहिलो पटक वडाले सार्वजनिक सुनुवाई कार्यक्रम गरेको भन्दै यसलाई हरेक वर्ष निरन्तरता दिन पनि वडा वासिहरुले आग्रह गरेका छन् ।
कार्यक्रममा नेपाली कांग्रेसका वडा समिति सचिव मान बहादुर मगर,एमाले वडा कमिटीका सचिव दिल कुमार श्रेष्ठ र माओवादीका वडा कमिटी अध्यक्ष नारायण बाबु श्रेष्ठ लगाएतले वडा कार्यालयले गरेका कामको बारेमा आ–आफ्नो मन्तब्य राख्दै समिक्षा गरेका थिए ।