स्थानीय तह क्षमता स्वमूल्यांकनमा मन्थली नगर पहिलो

रामेछाप । स्थानीय तह संस्थागत क्षमता स्वमूल्यांकनमा मन्थली नगरपालिका जिल्लाकै पहिलो बन्न सफल भएको छ । संघीय मामिला तथा सामान्य प्रशासन मन्त्रालयले आर्थिक वर्ष २०७७–७८ मा गरेको स्थानीय तह संस्थागत क्षमता स्वमूल्यांकनमा ६५.२५ अंकभार ल्याउँदै मन्थली नगरपालिका जिल्लाकै पहिलो बन्न सफल भएको हो ।
जिल्लाका ८ स्थानीय तहमध्ये स्थानीय तह संस्थागत क्षमता स्वमूल्यांकनमा मन्थली नगरपालिका पछि सुनापती गाउँपालिका कुल पुणाँकको ६० अंकभार ल्याउँदै स्थानीय तह संस्थागत क्षमता स्वमूल्यांकनमा दोस्रो स्थान प्राप्त गर्न सफल भएको छ । त्यसैगरि ६० अंकभारसहित रामेछाप नगरपालिका तेस्रो भएको छ भने ५१.७५ अंकभार ल्याउँदै खाँडादेवी गाउँपालिकाले चौथो स्थान प्राप्त गरेको छ । त्यस्तै गोकुल गंगा गाउँपालिका ४८ अंकभार ल्याएर पाँचौ हुन् सफल भएको छ ।
त्यसैगरि ४४.२५ अंकभार सहित उमाकुण्ड गाउँपालिका छैँठौँ भएको छ भने दोरम्बा शैलुङ गाउँपालिकाले ३४.२५ अंकभार सहित सातौँ स्थानमा आउन सफल भएको छ । त्यस्तै चरम विवादका कारण ५ बर्ष सम्म खासै काम हुन नसकेको लिखुतामाकोशी गाउँपालिका भने १६.५ अंकभार सहित आठौँ स्थानमा पुगेको छ ।
संघीय मामिला तथा सामान्य प्रशासन मन्त्रालयले हरेक बर्ष शासकीय प्रबन्ध, संगठन तथा प्रशासन, वार्षिक बजेट तथा योजना व्यवस्थापन, वित्तीय एवं आर्थिक व्यवस्थापन, सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण लगायतका विषयमा स्थानीय तहको संस्थागत क्षमता स्वमूल्यांकन गर्ने गरेको छ । सोहि आधारमा अघिल्लो बर्षको कामको मुल्याँकनमा मन्थली नगरपालीका यस बर्ष प्रथम हुन सफल भएको प्रमुख प्रशासकिय अधिकृत लीलाराज पौडेलले जानकारी दिए ।
मन्त्रालयले स्थानीय तहको कार्यगत र प्रकृयागत क्षमता तथा त्यसको उपलब्धिको बारेमा लेखाजोखा गरी कामको सबल र दुर्बल पक्षहरूलाई मापदण्डका आधारमा मुल्याँकन गरेका आधारमा मन्थलीले अब्वलता हासिल गरेको पनि प्रमुख पौडेलले बताए । उनले भने हामिले गरेको कामको आधारमा पाएको अब्बलताले हामिलाई थप काम गर्न उर्जा मिलेको छ ।
यसमा पुर्व जन प्रतिनिधि र कर्मचारीहरु सबै धन्यबादका पात्र छन् । टोलिको मुल्यांकनमा स्थानिय निकायको विकासको क्रम संगै शुसासनमा भए गरेका राम्रा र नराम्रा काम आदीको समिक्षा गर्नुका साथै गाउँपालिका तथा नगरपालिका बीचमा तुलनायोग्य सूचकहरूको तर्जुमा गरी प्रतिस्पर्धात्मक सुधारमा अग्रसर गराउन पनि अभिप्रेरित गरिएको छ ।
स्थानीय तहलाई शुसासनमुखि,सक्षम र प्रभावकारी बनाउनका लागि स्थानीय सरकार सञ्चालन ऐन २०७४ को दफा ८० को प्रयोजनार्थ मन्त्रालयले हरेक वर्ष सबै स्थानीय तहहरुको संस्थागत क्षमता स्वमूल्यांकन गर्दै त्यसको परिणाम सार्वजनिक गर्नै गरेको छ । सोहि आधारमा गरिएको मुल्यांकनमा आफनो पालामा मन्थली नगपालिका प्रथम भएको भन्दै निवर्तमान उप प्रमुख मायाँ कार्किले पनि नगरको सिङ्गो टीमलाई धन्यबाद दिईन् ।