रणजोरको पक्की पुल जोखिममा !

२४ जेठ, २०७६

रामेछाप- जिल्लाको सदरमुकाम मन्थली बजारको छेउमै रहेको रणजोर खोलाको पक्की पुल जोखिममा परेको छ । राजधानी काठमाडौ र सिङ्गो तराई जाने मुख्य एक मात्र नाकाको रुपमा रहेको उक्त पुल पुलमुनिको खोला, घडेरी खारेको माटो र सडकमा बग्ने गरेको भलका कारण जोखिममा परेको हो । 

रामेछापेली नागरिकहरूको लामो प्रतिक्षालाई सम्मान गर्दै करिव दश वर्ष अघि निर्माण गरिएको उक्त पुल रणजोर खोलाको बाढी संगै आउने लेदोले पुरिने अबस्थामा पुगेको छ । त्यसैगरि पुल दाँया बाँयाका सडकमा बग्ने भल पनि सधैभरी पुलमा जम्मा भएर बस्ने गरेको छ । जसका कारण सडकमा जम्मा हुने गरेको हिलो यात्रा गर्ने यात्रीहरुका लागि अभिषाप हुने गरेको छ ।

मन्थली नगरपालीकाले गरेको सडक सुधारको कामका क्रममा आउने भल र मच्चेडाँडी देखि  आउने बाढी पनि पुलमानै जम्मा हुने गरेकोले पुल माथिको भाग पनि  जीर्ण बन्दै गएको स्थानीहरूको गुनासो रहेको छ । यो समस्याले यस पटकको बर्षादमानै निकास पाउन सकेन भने पुल जोखिममा पर्ने अबस्था बढ्दै जाने स्थानीयहरूको गुनासो रहेको छ । 

नियमित रुपमा बग्ने भलले पुलको भैसेश्वर तर्फका स्पानको मुखनै भत्कन थालेको छ ।  दैनिक सयौँको संख्यामा गुड्ने सवारीसाधनको कारण पुल र आसपासका बस्तीहरुलाइ समेत  पानी पर्दा हिलो र पानी नपर्दा धुलोबाट तड्पीदै आएका छन् । करोडौको लागतमा बनेको पक्की पुलको संरक्षणका लागि सरोकारवाला निकायले खासै चासो नदिएको अनुभुति सर्वसाधारणले गरेका छन् ।

पुलको जोखिमताका बारेमा सडक विभाग खुर्कोटका ईन्जिनियर रामबहादुर विकले अहिले सडक सुधारको काम भईरहेकोले वर्षाद हुँदाको बखत उक्त माटो बगाएर पुल सम्म आउँदा समस्या देखिएको भएपनि निर्माणाधिन नाला र मन्थली बजार प्रवेशको सडकको कालो पत्रेको काम सम्पन्न भएपछि समस्या निकै हटेर जाने बताउनुभएको छ ।