१६ भदौ, २०७६
पुरानागाउँ- रामेछापको मन्थली नगरपालिका वडा नं. ९ पुरानागाउँमा रहेको प्रसिद्ध धार्मिक स्थलको रुपमा परिचित थानापति महादेवस्थान मन्दिरमा भव्य मेला लागेको छ । विशेष रुपमा महिलाहरुले मनाउने महान चाड हरितालिका तीजको अवसरमा लागेको मेलामा करिब पाँच हजारको हाराहारीमा भक्तालुजनहरुले दर्शन गरेका छन् ।
हरितालिका तीजको ब्रत बसेका महिलाहरु सोमबार विहानै देखि पुजा पाठ गर्न मन्दिरमा आएका थिए । विहान देखि बेलुका सम्मको समयमा पाँच हजार भन्दा बढी भक्तजनहरु आएको वडाअध्यक्ष बुद्धी बहादुर पुलामी मगरले बताउनुभयो । वडा अध्यक्ष पुलामी मगरका अनुसार रामेछापका विभिन्न ठाउँ तथा अन्य जिल्लाका भक्तजनहरु समेत पूजाको लागि महादेवस्थान मन्दिरमा आउने गरेका छन् ।
स्थानीय संस्थाको आयोजनामा विषेश कार्यक्रम
स्थानीय संस्था बाङ्गेसल्ला युवा समाजको आयोजना तथा मन्थली नगरपालिका वडा नं. ९ पुरानागाउँको समन्वयमा ‘थानापति धार्मिक पर्यटन तथा साँस्कृतिक कार्यक्रम–२०७६’ पनि भव्यताका साथ सम्पन्न भएको छ । हामी सबैको साझा ध्यान थानापति धार्मिक, साँस्कृतिक र पर्यटन प्रबद्र्धन भन्ने मुल नाराका साथ आयोजना गरिएको कार्यक्रममा थानापति महादेवस्थानको प्रचारप्रसार गर्न राष्ट्रिय स्तरका कलाकारहरुले विभिन्न प्रस्तुतिहरु देखाएका थिए ।
बाङ्गेसल्ला युवा समाजका अध्यक्ष कर्मन तामाङको अध्यक्षता तथा मन्थली नगरपालिकाका नगर प्रमुख रमेश कुमार बस्नेतको प्रमुख आतिथ्यतामा कार्यक्रम सम्पन्न भएको छ । कार्यक्रममा बोल्दै नगर प्रमुख रमेश कुमार बस्नेतले थानापति महादेवस्थान मन्दिरलाई जिल्लाकै सुन्दर पर्यटकिय स्थलको रुपमा विकास गर्नको लागि पुरातत्व विभागसँग मिलेर गुरुयोजना बनाएर अगाडी बढ्ने तयारीमा नगरपालिका रहेको बताउनुभयो । उहाँले नगर विकासको लागि आफ्नो बाँकी कार्यकालमा रातदिन खटेर काम गरिरहने प्रतिबद्धता व्यक्त गर्नुभयो ।
कार्यक्रममा बोल्दै राजनीतिक दलका नेताहरुले धार्मिक रुपमा एउटा छुट्टै पहिचान बोकेका थानापति महादेवस्थान मन्दिरको विकास गरेर आन्तरिक र बाह्य पर्यटक भित्र्याउन सके जिल्लानै समृद्ध बन्ने दाबी गरेका छन् । उनिहरुले थानापति महादेवस्थान मन्दिरको विकासमा स्थानीय सरकार, प्रदेश सरकार र केन्द्रिय सरकारको समन्वय हुनु पर्नेमा जोड दिएका छन् । संस्थाले थानापति महादेवस्थान मन्दिरको विकासमा विभिन्न क्षेत्रबाट सहयोग पुर्याउने व्यक्तिहरुलाई सम्मान समेत गरेको छ ।
यो बारेमा तपाईको प्रतिकृया