युवा संघ रामेछापको खुल्ला दौड प्रतियोगिता

मन्थली,११ चैत । नेकपा एमाले निकट राष्ट्रिय युवा संघ नेपाल रामेछापले होली पर्वको अवसर पारेर खुला दौड प्रतियोगिताको आयोजना गरेको छ ।
संघले महिला र पुरुषलाई छुट्टछुट्टै सहभागी गराएर प्रतियोगिता सञ्चालन गरेको हो ।
प्रतियोगिताका लागि मन्थली स्थित भैशेश्वर चोक नजिकैको रणजोर खोला पुलबाट मदन आश्रित चोक, देवकोटा चोक, ट्राफिक विट हुँदै अकासे पुलसम्मको यात्रामा सहभागीहरू दौडिएका थिए । खुल्ला रुपमा संचालन गरेको उक्त प्रतियोगिताका लागि महिला तर्फ दर्ता नं ७८ नम्बरका सहभागी सविना थापा र सहभागि पुरुष तर्फ ९ नम्बरका अरुण खड्काले प्रथम स्थान हासिल गर्न सफल भएका थिए ।
त्यसैगगरी प्रतियोगिता अन्र्तगत महिला तर्फ ४२ नम्बरकी सहभागी संगीता केसी दोस्रो र जर्सि न २७ की मनीषा कार्की तेस्रो भएकी छिन् । पुरुष तर्फ २० नम्बरका उत्तम माझी दोस्रो र ११ नम्बरका कौशल कार्की तेस्रो भएका छन् । प्रतियोगिताका सहभागिहरुलाई राष्ट्रिय युवा संघका केन्द्रिय उपाध्यक्ष कृष्णहरी खत्रीले नगद पुरस्कार र प्रमाण पत्र प्रदान गर्नु भएको थियो । सो अवसरमा नेकपा एमालेका जिल्ला अध्यक्ष एवं बागमती प्रदेश सभा सदस्य आनन्द कुमार श्रेष्ठ लगायत एमालेका नेता तथा कार्यकर्ताहरुको सहभागिता रहेको थियो ।
प्रतियोगितामा पहिलो, दोस्रो र तेस्रो हुने सहभागीहरूले क्रमशः पाँच हजार, तीन हजार र दुई हजार रुपैयाँ नगद पुरस्कार सहित प्रमाणपत्र र मेडल वितरण गरिएको थियो । रङहरूको पर्व होलीलाई मैत्रीपुर्ण बनाउँदै र स्वास्थ्यका लागि खेलकुद भन्ने मुल नारालाई अंगिकार गर्न र खेल क्षेत्रमा युवाहरूको सक्रियता अभिवृद्धि गराउनका लागि कार्यक्रमको आयोजना गरिएको राष्ट्रिय युवा संघ नेपाल रामेछापका अध्यक्ष सुरेन्द्र कार्कीले वताउनुभयो ।