रामेछाप- पाँचौ उद्योग दिवसमा रामेछापका चार जना उद्योगी सम्मानित भएका छन् । घरेलु तथा साना उद्योग विकास समिति रामेछापले जिल्लाका चार जना सफल उद्योगीहरुलाई सम्मान गरेको हो । ‘उद्योग र पूर्वाधार, समृद्धीको आधार’ भन्ने मूला नाराका साथ सदरमुकाम मन्थलीमा आयोजना गरिएको अन्तरक्रिया तथा छलफलमा नगद सहित सम्मान गरिएको छ ।
जिल्लामा लामो समय देखि साना उद्योगका रुपमा संचालनमा रहेका चिरञ्जिवी डेरी उद्योग, शिवभक्ती बाँस उद्योग, लाङ्घाली ढाका कपडा उद्योग र मन्थली डिलक्स एग्रो फरेस्ट्री प्रोडक्सन प्रालि जुस उद्योगका संचालकहरु दुई हजार पाँच सयको साथमा सम्मानित भएका हुन् । सम्मानित हुनुभएका मन्थली डिलक्स एग्रो फरेस्ट्री प्रोडक्सन प्रालि संचालक लोकेन्द्र कुमार श्रेष्ठले समितिले गरेको सम्मानले व्यवसाय गर्न थप उर्जा मिलेको भन्दै आफ्नो व्यवसायलाई निरन्तर रुपमा अगाडी बढाउने बताउनुभयो । श्रेष्ठले नीजि लगानीमा संचालनमा रहेका साना उद्योगीलाई सरकारले थप सहयोग गर्नु पर्नेमा जोड दिनुभयो ।
३ नम्बर प्रदेश सरकार अन्तरगत रहेको घरेलु तथा साना उद्योग विकास समिति रामेछापका प्रमुख मेघनाथ गौतमको अध्यक्षता, मन्थली नगरपालिकाका नगर प्रमुख रमशे कुमार बस्नेतको प्रमुख आतिथ्यता तथा प्रमुख जिल्ला अधिकारी लिला कुमारी केसी पाण्डेको आतिथ्यतामा भएको कार्यक्रममा जिल्लाका व्यवसायिहरुले विभिन्न समस्याहरु राखेका छन् । व्यवसायिहरुले राखेको समस्यालाई दिर्घकालिन समधान हुने गरी आगामी कार्यक्रम बनाउने सरोकारवाला निकायका प्रमुखले प्रतिबद्धता जनाएका छन् ।
यो बारेमा तपाईको प्रतिकृया