रामेछाप–रामेछाप जिल्लामा (कोभिड–१९) कोरोना भाइरसका कारण संक्रमितहरुको संख्या दिनानुदिन बृद्धि हुन थालेपछि जिल्लाका बिभिन्न पालिकाहरुले अत्याबश्यक सेवा बाहेक सबै किसिमका सेवाहरु बन्द गर्न थालेका छन् ।
चार दिन अघि मन्थली नगरपालिकाका स्वास्थ्य कर्मि र मन्थलीकै अर्का १ पुरुष समेत २ जनालाई संक्रमण पुष्टि भएपछि शुक्रवारदेखि नै नगरपालिकाको कार्यालय सिल गरी पालिका बाट प्रवाह गरिदै आएको स्वस्थ्य र बिपद् बाहेकका सबै सेवाहरु बन्द गरिएको थियो । पालिका बन्द भएसँगै मन्थली नगरपालिकाका नगर प्रमुख लगाएत जनप्रतिनिधि र कर्मचारीहरु हाल होम क्वारेन्टीनमा बसिरहेका छन् ।
देशब्यापी रुपमा र रामेछाप जिल्लामा संक्रमितको संख्या दिनानुदिन बढ्दै गएपछि रामेछाप जिल्लाका बिभिन्न पालिकाहरुले केन्द्रीय संकट ब्यवस्थापन केन्द्रको निर्देशन र जिल्ला संकट ब्यवस्थापन केन्द्रको निर्णय समेतलाई आधार मानि धमाधम सेवा बन्द गर्न लगेका हुन् ।यसै बिच रामेछाप नगरपालिकाले आइतबार सार्बजनिक सूचना मार्फत भदौ १ गतेदेखि अर्को सूचना जारी नहुन्जेल सम्मका लागि आफ्ना सबै सेवाहरू बन्द गरेको जनाएको छ । नगरपालिकाले नगरवासीको स्वास्थ्यलाई ध्यानमा राखि अत्याबश्यक (स्वस्थ्य र बिपद्) सेवा बाहेक सबै वडाका सेवाहरु बन्द गरिएको जनाएको छ ।
नगर प्रमुख नरबहादुर थापागमरद्धारा हस्ताक्षरित सूचनामा कोभिड–१९ को सक्रमण फैलदै गएको बर्तमान अबस्थामा नेपाल सरकारको मिति २०७७÷०४ ÷२६ र जिल्ला संकट ब्यवस्थापन केन्द्रको २०७७÷०४÷२९ को निर्णय समेतको आधारमा पालिकाका सबै सेवाहरु बन्द रहने कुरा उल्लेख गरिएको छ ।
त्यसैगरी लिखु तामाकोसी गाँऊपालिकाले पनि स्वस्थ्य र बिपद बाहेक आफ्ना सबै सेवाहरु बन्द गरिएको जानकारी गराएको छ ।
पालिकाकी उपाध्यक्ष दिपशिखा न्यौपाने दाहाल द्धारा आइतबार जारी गरिएको सूचनामा २०७७ भदौ १ गते देखि ११ गते सम्मका लागि पालिका र वडाहरुबाट प्रवाह हुने स्वस्थ्य र बिपद् बाहेक सबै प्रकारका सेवाहरु बन्द गरिएको जनाइएको छ ।
उता खाँडादेवी गाउपालिकाले पनि शुक्रवारनै सार्बजनिक सूचना जारी गरी साउन ३० गते देखि भदौ १२ गते सम्म अत्यावश्यक स्वस्थ्य र बिपद् वाहेक सम्पुर्ण सेवाहरु बन्द गरेको जनाइसकेको छ । त्यस्तै गोकुलगंगा गाउपालिकाले पनि यहि साउन ३० गतेदेखि लागु हुने गरी अर्को सूचना जारी नभएसम्मका लागि पालिका बाट प्रवाह हुने अत्यावश्यक बाहेकका सबै सेवाहरु बन्द गरिएको जनाएको छ ।
त्यसैगरी दोरम्बा गाउपालिकाका अध्यक्ष कमान सिं तमाङ र उमाकुण्ड गाँउपालिकाका प्रमुख प्रशासकिय अधिकृत इश्वरी प्रसाद सुबेदीले पनि भदौ १ गते निर्णय गरी सोहि मिति देखि लागु हुनेगरी आ आफ्ना पालिकाबाट प्रवाह हुने अत्याबश्यक बाहेकका सबै सेवाहरु बन्द गर्ने तयारी भैरहेको जानकारी दिनुभएको छ ।
त्यस्तै सुनापाति गाउपालिकाका अध्यक्ष धावा लामाले यहि भदौ ४ गते कार्यपालिकाको बैठक तय भैसकेकोले यस बारेमा सोहि बैठकले आबश्यक निर्णय गर्ने भन्दै पालिकाबाट प्रवाह हुने सबै अत्यावश्यक बाहेकका सेवाहरु बन्द हुन सक्ने संकेत गर्नुभयो ।
यो बारेमा तपाईको प्रतिकृया