रामेछाप । शुक्रवार देखि काठमाण्डौ बाट रामेछापको मन्थली सम्म बिद्युतिय माइक्रोबस सेवा शुरु भएको छ ।
आज दिउसो बस सहित मन्थली आइपुगेका माइक्रो बस सञ्चालक समितिका पदाधिकारीहरुले औपचारिक रुपमा काठमाण्डौं –मन्थली बस सेवा सुरु भएको जानकारी दिदै मन्थली नगरपालिकामा नगर प्रमुख,पत्रकार र उद्योग बाणिज्य संघका पदाधिकारीहरुसँग अन्तरकृया गरि प्रभावकारी ढंगबाट बस सञ्चालन गर्न सुझाब संकलन गरेका थिए ।
भव लक्ष्मी यातायात सेवा प्रालि द्धारा सञ्चालन गरिएको उक्त बसमा चालक सहित २० जना यात्रुको क्षमता रहेको र यसको ब्यट्रि फुल चार्ज गर्दा ३ सय किलोमिटर सम्म गुड्ने प्रालिका अध्यक्ष ऋतु प्रसाद चौलागाइले बताउनुभयो ।
हाल २ वटा मात्र बस रहेको र बस सख्या थप्दै जाने तयारीका साथ हाललाई टाटा सुमोले लिने भाडा दरमै यात्रीहरुलाई सेवा दिन सकिने पनि उहाले बताउनुभयो ।
पूर्ण रुपमा ए सी सहित,टिभि,मोबाइल चार्जिङ प्वाइन्ट र हरेक सिटमा सिट बेल्ट समेत रहेको उक्त बसले अरु यातायातका साधन भन्दा आरामदायि यात्रा गराउने उहाले दावी गर्नुभयो ।
मन्थली नगरपालिकामा आयोजना गरिएको अन्तरकृया कार्यक्रमका अबसरमा बोल्ने पत्रकार महासंघका अध्यक्ष रमेश ढुंगेल, पूर्ब अध्यक्ष टिका प्रसाद भट्ट, बद्री नयाँघरे र पत्रकार ज्ञानु श्रेष्ठले नयाँ आएको यो यातायातले प्रभाबकारी सेवा दिन आग्रह गरे । उनीहरुले बसका चालक र सह–चालकले सबै खाले यात्रीहरुलाई राम्रो ब्यबहार गर्न अनुरोध गरे ।
उद्योग बाणिज्य संघका अध्यक्ष केशब प्रसाद घिमिरेले हरेक कुराले सुबिधा सम्पन्न नयाँ यातायात जिल्लामा भित्रेकोमा स्वागत गदै कसैको पनि गुनासो नआउने गरी वस सञ्चालन गर्न आग्रह गर्नुभयो । कार्यक्रमका अबसरमा यातायात सञ्चलक समितिका सदस्य डा. वाशुदेव गौतमले काठमाण्डौ बाट मन्थली आएर फेरी काठमाण्डौ फर्कदा सम्म बिचमा चार्ज गर्ने स्थान नभएकोले मन्थली नगरापलिकाले चार्जिङ सेन्टर निर्माण गरिदिन आग्रह गर्नुभयो ।
मन्थली नगर प्रमुख रमेश कुमार बस्नेतले बातावरण मैत्री माइक्रोबस जिल्लामा भित्रिएको प्रति खुशी ब्यक्त गर्दैै यस्ता बसहरु थप बिस्तार भएमा चर्जिङ स्टेशन निर्माण गर्न कुनै समस्या नहुँने बताउनु भयो ।
उहाँले हाल २ बजे पछि सबै मन्थली बाट गाउ गाउ जाने सबै ठाँउका यात्रुवाहक सवारी साधनहरु फर्किसक्ने हुँदा कार्यालय समय सकिएपछि पनि नगवासीहरुको सुबिधाकालागि यस्ता नगर बसहरु नगर क्षेत्र र जिल्लाका अन्य भागहरुमा पनि सञ्चालन गरिदिन आग्रह गर्नुभयो ।
लामो दुरीमा सञ्चालन हुने यो नै पहिलो बिद्युतिय माइक्रोबस भएको दावी गरिएको छ ।
यो बारेमा तपाईको प्रतिकृया