बेलारुसमा हुन लागेको गोमेल युरो ओपन कप २०१९ अघारौं इन्टरनेशनल कराँते कम्पिटिसन गेमको लागि रामेछापबाट पाँच कराँते खेलाडी छनौट भएका छन् । त्यस्तै उक्त गेमको लागि एक जना कराँते प्रशिक्षक रेफ्रीमा छनौट हुनुभएको छ ।
कम्पिटिसनको लागि मन्थली मावि कक्षा १० मा अध्ययनरत छात्रा सन्जना माझी, कक्षा ९ मा अध्ययनरत छात्र सञ्जिब तामाङ र कक्षा १२ मा अध्ययनरत छात्र विश्वास हायु रहेका छन् । त्यस्तै तामाकोशी इगंलिस बोर्डिङमा कक्षा ८ मा अध्ययनरत छात्र विशाल केसी र लिटिलस्टार बोर्डिङ स्कुलमा कक्षा ७ मा अध्ययनरत रोशन खाती रहेका छन् । त्यसैगरी रेफ्रीको लागि कराँते प्रशिक्षक एवं कराँते महासंघ रामेछापका सचिब शुक्र माझी छनौट हुनुभएको छ । रामेछापका पाँच सहित नेपालबाट १६ जना खेलाडीले उक्त खेलमा भाग लिने महासंघका सचिब माझीले जानकारी दिनुभयो । खेलाडी तथा प्रशिक्षकको धेरै मेहनत र लगनशीलताले गर्दा राम्रा खेलाडी तयार गर्न सकेको कारण जिल्लाबाट पाँच जना खेलाडी छनौट हुन सफल भएको सचिब माझीले बताउनुभयो ।
अन्तराष्ट्रिय स्तरको खेलमा सहभागिता जनाउनको लागि अझै पनि जिल्लाको कराँते खेललाई विकास गर्न सबै लाग्नु पर्ने सचिब माझीको भनाई रहेको छ । अझै पनि कराँते खेलको बारेमा धेरै अभिभावकहरुलाई पूर्ण रुपमा जानकारी नहुँदा कराँते खेलमा आफ्न बालबालिकाहरुलाई नपठाउने गरेकाले त्यसमा सबै अभिभावकहरुलाई कराँते खेलको बारेमा जानकारी गराउँन आवश्यक रहेको पुर्व कराँते खेलाडी विनोद केसीले बताउनुभयो ।
प्रतियोगिताको लागि असोज २९ गते नेपालबाट १६ जना खेलाडी सहितको टोली बेलारुस जाँदैछ ।
यो बारेमा तपाईको प्रतिकृया