रामेछाप ४ जेठ । आगामी जुन महिनाबाट रामेछापको सदरमुकाम मन्थलीबाट काठमाडौँका लागि नियमित उडान निश्चित भएको छ । जिल्ला समन्वय समितिको पहलमा बिहीबार बसेको जिल्लाको सर्व पक्षीय बैठकले गरेको निर्णयपछि मन्थली –काठमाडौँ,काठमाडौँ – मन्थली सम्म हप्तामा एक दिन शुक्रवार नियमित जहाज चल्ने निश्चित भएको हो ।
मन्थली विमानस्थल भएर दैनिक लुक्लाका लागि सयौँ पर्यटकहरू लिएर दर्जनौँ जहाज चल्ने र सर्वसाधारण भने सङ्कटमा पनि त्यसको उपयोग गर्न नपाउने भएपछि लामो समयदेखि जहाज कम्पनीहरू सँग सर्व साधारणहरूको गुनासो निकै चुलिएको थियो । उक्त गुनासाहरुका आधारमा सङ्घीय सांसद पूर्ण बहादुर तामाङको अगुवाई र प्रदेशसभा सदस्य र मन्थली नगरापालिकाका प्रमुख समेतको सहयोगमा दुई महिना अघिबाट सुरु गरिएको प्रयासले आजको सर्वदलीय बैठक सँगै पूर्णता पाएको हो ।
आगामी जुन महिनाबाट प्रत्येक हप्ताको शुक्रवार मन्थली बाट नियमित उडान गर्दे आएका तारा, समिट र सीता एयर प्रालिले पालोमा मन्थली–काठमाडौँ नियमित उडान गर्नका लागि सबै तयारी पुरा भएको नागरिक उड्डयन कार्यालय रामेछापले जनाएको छ । जेठ ३ गते भएको प्राधिकरणका पदाधिकारी र वायुसेवा कम्पनीका पदाधिकारीहरू बिच भएको निर्णयका आधारमा आजको बैठकले उडान नियमित गराउनका लागि सबै पक्षले सक्रिय र सकारात्मक पहल गर्ने निर्णय भएको जिल्ला समन्वय अधिकारी विनीता भट्टराईले जानकारी दिइन् ।
उक्त निर्णयले जिल्ला वासीहरुलाईनै खुसी बनाएको नागरिक अगुवा टीका भट्टले बताए । उनले भने जिल्लाको सम्पत्तिको रूपमा पहिचान बनाएको मन्थली एयरपोर्टबाट पैसा तिरेर काठमाडौँ जान्छु भन्ने बिरामी तथा सर्व साधारणका लागि कम्पनीहरूले रोक लगाएका कारण उत्पन्न समस्या बिहीबार बाट समाधान भएको छ ।
बैठकमा बोल्ने सबै सहभागीहरूको भने एउटै आवाज रहेको थियो । उनीहरूले जहाजको उडानलाई नियमित बनाउन सके त्यसबाट सर्व साधारणले पनि राहतको महसुस गर्ने भएकोले यसको निरन्तरतामा जोड दिएका थिए । यसका लागि भाडा दरलाई पनि सर्व सुलभ बनाउनु पर्ने पनि उनीहरूले तर्क गरे ।
बैठकमा मन्थली नगर प्रमुख लव श्रेष्ठले वायुसेवा कम्पनीहरू नाफामुखी मात्रै बनेकाले सेवा मुखी पनि बनेर रामेछापका नागरिकको माग अनुसार छिटो भन्दा छिटो नियमित उडान गर्नुपर्ने कुरामा जोड दिए ।
मन्थली विमानस्थलमा रात्रिकालीन विमान पार्किङ राखेर लुक्लाका लागि उडान गर्ने तारा, सीता र समिट एयरलाई नागरिक अगुवा,स्थानीय सरकार, राजनीतिक दल र सांसदहरूले समेत पटक पटक सातामा एउटा उडान काठमाडौँका लागि राख्न आग्रह गर्दै आएको भएपनि विमान कम्पनीहरूले भने उक्त कुराको वेवास्ता गर्दे आएका थिए ।
बैठकमा बोल्दै नेपाली काँग्रेस रामेछापका उप– सभापति लेख बहादुर कार्कीले लुक्लाका लागि दैनिक दर्जनौँ उडान गर्ने विमान कम्पनीले मन्थली–काठमाडौँको एउटा पनि उडान नराखेर आम जिल्लावासीको आत्मा सम्मानमा चोट पुराएको बताए । उनले भने उक्त निर्णय सँगै बिरामी, अशक्त, गर्भवती, शल्यक्रियाका बिरामीहरूलाई राहतको अनुभूति हुने छ ।
नागरिक उड्डयन प्राधिकरणले (वसन्त ऋतु) को चैतदेखि जेठ महिनासम्म र (शरद ऋतु) को असोज पहिलो सातादेखि मङ्सिरको १५ सम्म रामेछापको मन्थली विमान स्थल मार्फत लुक्ला पर्यटक लैजाने व्यवस्था गरेको छ । यो सिजनमा मन्थली विमान स्थलबाट दैनिक झन्डै एक हजार ५सय पर्यटकहरूको आवोत जावोत हुँदै आएकोले पनि उक्त एअरपोर्टको महत्व बढेको छ ।
यो बारेमा तपाईको प्रतिकृया