मन्थलीको सडक बत्ति उपयोग विहिन, जडान गरेको चार महिना वितिसक्दा पनि अझै बत्ति वलेन

रामेछाप,२३ चैत्र । नेपाल विधुत प्राधिकरणले मन्थली बजार आसपासमा जडान गरेको सडक बत्ती प्रयोग बिहिन भएको छ । बजार क्षेत्रलाई रातको समयमा पनि उज्यालो राखी शान्ति सुरक्षालाई मजबुद बनाउनका लागि जडान गरिएको सडकका बत्तीहरू अहिले सम्म बल्न सुरु गरेका छैनन् ।
विद्युत प्राधिकरणले आफ्नो जिम्मेवारीलाई प्राथमिकतामा नराख्दा सडक बत्ति प्रयोग बिहिन भएको स्थानीयले गुनासो गरेका छन् ।
सडकमा बत्ति नबल्दा मन्थली बजार आसपासमा रातको समयमा हिडडुल गर्न कठिनाइ भएको छ भने चोरीका घटनाहरु बढन लागेका छन् ।
सडक बत्ति हुँदा पनि हुने गरेको अन्धकारले बजार र बजार आसपासका स्थानीयहरू मारमा परेका छन् । राती अबेरसम्म काम गरेर घर फर्कनेहरु र बिहान सबेरै “मर्निङ वाक” गर्नेहरूलाई सडक बत्ती नबल्दा धेरै समस्या भएको छ ।
मन्थली बजारमा आफ्नो व्यापार ब्यवसाय गर्ने व्यवसायीहरूलाई समेत यो समस्याले ग्रसित बनाएको स्थानीय व्यवसायी महेश्वर कर्माचार्य बताउनुहुन्छ । सडक बत्ती नबल्दा कुकुरले टोक्ने डर बढ्ने तथा विहान सबेरै क्याम्पस जाने विद्यार्थीहरुले समस्या भोग्नु परेको उनको भनाई छ । जडान गरिएको बत्ती महिनौसम्म पनि नबल्दा रातको समयमा आफ्नो घर जान पनि डराउनु पर्ने बाध्यता भएको स्थानीय मनिशा बसेल बताउनुहुन्छ । । उहाँ भन्नुहुन्छ –साँझ विहान वजार तिर निस्कदा “गलत नियत बोकेका युवाहरु बाटोभरी भेटिन्छन् । उनीहरूले बजारमा हिड्ने आफु जस्ता किशोरी र अन्य वटुवाहरुलाई जिस्क्याउने जस्ता कार्य गर्नाले साझपख बजार निस्कन डराउनु पर्ने अबस्था रहेको छ । ”
बजारमा जडान गरिएका बत्तीहरु नबल्दा देबकोटाचोकदेखि बसपार्कसम्म अति नै जोखिम मोलेर रातको समयमा हिडडुल गर्न बाध्य भएको स्थानीय तारा थापा गुनासो गर्नुहुन्छ । उहाँ भन्नुहुन्छ– “बजार क्षेत्रमा नै हामी जोखिममा छौँ । बाटो अन्धकार हुन्छ । बजारमा नै टर्च बालेर हिँड्न पर्ने अवस्था छ । अँध्यारोबाट हुने जोखिमको जिम्मेवारी कसले लिन्छ ? ”

रामेछाप बितरण केन्द्र मन्थलीका प्रमुख दिपेन्द्र बुढाथोकी सडकमा रहेको बत्ती बाल्ने काम आफ्नो नभएको बताउनुहुन्छ । उहाँ भन्नुहुन्छ– “यो काम रामेछाप बितरण केन्द्रको होइन । यो काम केन्द्रकै टेन्डर मार्फत भएको हो ।” बत्ति जडानको काम सम्पन्न भइसकेको तर अझै केही ठाउँमा बत्ति थप गर्नु परेकाले ढिलासुस्ती भएको हुन सक्ने अनुमान मेरो छ । ”
ढिला भयो भनेर स्थानीय स्तरबाट धेरै गुनासो आइरहेको छ तर हामीले माथिल्लो निकायमा पहल गरिरहेका छौ त्यसको कुनै जवाफ आएको छैन ।
चार महिना अघि चार करोडको लगानीमा रामेछापको मन्थली बजार र सुनापति गाउँपालिकाको बेथानमा गरी १ सय ७६ वटा बत्तीहरु नेपाल बिद्युत प्राधिकरणका महानिर्देशक कुलमान घिसिङले आफ्नो गृह जिल्ला र पालिकामा जडान गर्न लगाउनु भएको थियो ।
यसै विच मन्थली मा दैनिक रुपमा उपभोग गरिदै आएको बत्ति दिनमा धेरै चोटि आउने जाने गरेका कारण धेरैको विद्युतिय सामाग्रीहरु जल्ने गरेका छन् । अझ जुनसुकै बेला बिद्युत आबश्यक पर्ने बिद्युतिय सञ्चार माध्यमहरु भने यसको ठुलो मारमा परेका छन् । यस कृयाकलापले सञ्चार क्षेत्रलाई निक्कै समस्या पारेको पत्रकार महासंघ रामेछापका अध्यक्ष बद्रि नयाँघरे बताउनुहुन्छ ।