नगर कपको उपाधि चिसापानीलाई

मन्थली,७ फागुन । मन्थली नगरपालिकाले आयोजना गरेको तेस्रो मन्थली नगर कप पुरुष भलिबलको उपाधि मन्थली–८ चिसापानीले जितेको छ । चिसापानीले वडा नं १० चनखुलाई लगातार ३ गेमको सोझो सेटले पछि पार्दै उपाधि जितेको हो ।

बुधवार दिउसो भएको प्रतिस्पर्धामा चिसापानीले चनखुलाई क्रमश २५–१९, २५–९ र २५–१२ को सोझो सेटले जितेको थियो ।
विजयी वडालाई नगद १ लाख रुपैयाँसहित शिल्ड, ट्रफी, मेडल र प्रमाणपत्र मन्थली नगरपालिकाका प्रमुख लव श्रेष्ठ र उपप्रमुख इश्वरी बस्नेतले प्रदान गर्नुभएको थियो ।

उपविजेतामा बनेको मन्थली–१० चनखुले नगद ७५ हजार ट्रफि, मेडल र प्रमाण पत्र प्राप्त गरेको छ भने तेस्रो स्थान हासिल गरेको वडा नं ७ भटौली नगद ३० हजार सहित ट्रफि,मेडल र प्रमाण पत्र प्राप्त गरेको छ । यस अघि दोस्राे नगर कपमा भटौलीले पहिलो स्थान हासिल गरेको थियो ।

तेस्रो नगर कप अन्तर्गत भएको प्रथम महिला भलिबल कप वडा नं ७ भटौलीले जितेको छ । सो खेलमा विजयी खेलाडिहरुलाई नगद पचास हजार नगद सहित ट्रफि,मेडल र प्रमाण पत्र मन्थली नगरकी उपप्रमुख ईश्वरी बस्नेतले प्रदान गर्नुभयो ।

उपविजेता बनेको मन्थली–१३ फुलासीले नगद ३० हजार सहित ट्रफि,मेडल र प्रमाणपत्र प्राप्त गरेको छ ।
तेस्रो बनेको मन्थली–६ भलुवाजोरले नगद २० हजार सहित ट्रफि, मेडल र प्रमाण पत्र प्राप्त गरेको थियो ।
मन्थली नगरले यस अघि पुरुष भलिवल मात्रै खेलाउने गरेको भएपनि यस वर्षबाट भने महिला भलिवल पनि सुरु गरेको हो ।

यस पटकको महिला भलिबल खेलमा वडा नं १,२,३,६,७,८ र १३ का मात्र महिलाहरुले भाग लिएका थिए ।