रामेछाप,६ जेठ । रामेछाप जिल्लाबाट नवनिर्वाचित प्रमुखहरुले एकै साथ सपथ लिएका छन् । जिल्लाका आठ वटा स्थानीय तहका निर्वाचित नगरपालिका तथा गाउँपालिकाका प्रमुखहरुले शुक्रबार सदरमुकाम मन्थलीमा आयोजित औपचारिक कार्यक्रमका विच शपथ तथा निर्वाचित भएको प्रमाण पत्र ग्रहण गरेका हुन् ।
मुख्य निर्वाचन अधिकृतको कार्यालयले शुक्रबार मन्थली नगरपालिकामा आयोजना गरेको कार्यक्रममा जिल्लाका आठ वटै स्थानीय तहका प्रमुख एवं अध्यक्षहरूले शपथग्रहण गरेका थिए । मुख्य निर्वाचन अधिकृत डा.दिवाकर भट्टको उपस्थितिमा रामेछापका जिल्ला न्यायाधिश बद्रीप्रसाद ओलीले निर्वाचित जनप्रतिनिधिहरुलाई एक औपचारीक कार्यक्रमका विच शपथ गराउनु भएको थियो ।
शपथ ग्रहण समारोहमा जिल्ला न्यायधिस ओलिले दलका प्रतिनिधिले नागरिकको पक्षमा राम्रो काम गर्नका लागि पनि सुझाब दिनु भयो । उहाँले जन प्रतिनिधिले राम्रो काम गर्न नसक्दा आफु आबद्ध दल र आफ्नो पनि भविष्य बरबाद हुने भएकोले दुवै कुरालाई ध्यानमा राखेर काम गर्न जनप्रतिनिधिलाई सुझाव दिनुभयो ।
सपथ ग्रहण समारोहमा मुख्य निर्वाचन अधिकृत भट्टले जनप्रतिनिधिले नमूना लायक काम गरेको सुन्न र देख्न चाहेको भन्दै मतदाता,राजतिनिक दल, प्रशासन सुरक्षाबल, नागरिक समाजको समेत सहयोगका कारण निर्वाचन शान्तिपुर्ण र सफलतापूर्वक सम्पन्न भएकोमा सबैलाई धन्यबाद पनि दिनुभयो ।
सपथ ग्रहण कार्यक्रममा बोल्दै नवनिर्वाचित प्रमुखहरुको तर्फबाट मन्थली नगरपालिका प्रमुख लब श्रेष्ठले सबै पक्ष र राजनितिक दलहरुसँग समन्वय गरी विकासको काममा लाग्ने कुरामा आफु प्रतिबद्ध रहेको भन्दै सहयोगका लागि सबै सँग आग्रह गर्नुभयो । आठ पालिकाका प्रमुख संगै मन्थली नगरपालिकाका अध्यक्ष र निर्वाचित वडा सदस्यहरुलाई पनि सो अबसरमा निर्वाचनमा विजयी भएको प्रमाण पत्र सहित स्वागत गरिएको थियो ।
विहिबार राति सम्पन्न मत परिणाम अनुसार रामेछापका आठ वटा स्थानीय तह मध्ये नेपाली कांग्रेसबाट रामेछाप नगरपालिका प्रमुखमा लवश्री न्यौपाने, गोकुलगंगा गाउँपालिका अध्यक्षमा काजीबहादुर खड्का (दिनेश) र लिखु तामाकोसी गाउँपालिका अध्यक्षमा केशव महत निर्वाचित भएका छन् ।
यसै गरी नेकपा एमालेबाट मन्थली नगरपालिका प्रमुखमा लब श्रेष्ठ, उमाकुण्ड गाउँपालिका अध्यक्ष शेरबहादुर सुनुवार र खाँडादेवी गाउँपालिका अध्यक्षमा ज्ञानकुमार श्रेष्ठ निर्वाचित भएका छन् । त्यसैगरी माओवादी केन्द्रबाट दोरम्बा शैलुङ गाउँपालिकाको अध्यक्षमा मैनकुमार मोक्तान र सुनापति गाउँपालिकाको अध्यक्षमा ठुलोकान्छा तामाङ निर्वाचित भएका छन् ।
यसैबिच मन्थली नगर प्रमुख लब श्रेष्ठ ले पनि शुक्रवार नै आफ्नो पदभार ग्रहण गर्नु भएको छ । पदभार ग्रहण गरे सँगै नगरपालिकामा निर्बाचित उपप्रमुख लगाएत १४ वटै वडा का अध्यक्ष र सदस्यहरुलाई पद तथा गोपनियाताको सपथ गराउनु भएको थियो ।
सोहि अबसर पारेर मुख्य निर्बाचन अधिकृतको कार्यालय रामेछापले चुनाव अबधिमा शान्ति सुरक्षामा उल्लेखनिय योगदान पुर्याएको भन्दै जिल्ला प्रहरी कार्यालय रामेछाप, शसस्त्र प्रहरी वल रामेछाप, रामेछाप ब्यारेक र राष्ट्रिय अनुसन्धान कार्यालय रामेछापका प्रमुखरुलाई प्रशंसा पत्रले सम्मान गरेको छ ।
यो बारेमा तपाईको प्रतिकृया