रामेछाप- बुधबार मध्य दिउँसो जिल्ला अस्पताल रामेछापको प्राङ्गणमा ६८ वर्षिया एक महिला निकै खुसी मुद्रमा हुनुहुन्थ्यो । वर्षौ देखि तल्लो पेट दुखाईको पीडामा रहनुभएकी ६८ वर्षिया महिलाले आफ्नो पीडा एकै छिनमा भुल्नुभयो । पीडा भुल्नुको कारण एउटै थियो, वर्षौ देखि दुख्दै आएको तल्लो पेटको जाँच पछि डाक्टरले भनेको शब्द– ‘उपचार पछि तपाईको दुखाई हराउँछ ।’
आफैले भोट दिएर बनेको गाउँकै सरकारले पैसा नलाग्ने सिविर राखेको छ भन्ने कुरा थाहा पाएर सिविरमा आउनुभएकी रामेछाप ८ की देबी माया तामाङले विगतको दुखाईलाई सम्झिनुभएन, बरु खुसी हुँदै सरकार प्रमुखलाई यसरी सम्झिनुभयो –‘धेरै वर्ष देखि दुखीरहेको पेट अहिले नै दुख्न छोड्यो, एक भोट दिएको बल्ल काम लाग्यो, उपचार गर्न पैसा पनि लाग्दैन रे, डाक्टर साबले भन्नुभाको उपचार पछि मेरो पेट पनि दुख्दैन रे ।’
जाँचका क्रममा डाक्टरले देवी मायालई रेक्टोसिल र सिस्टोसिल भएकाले उपचार गरेपछि उहाँलाई निको हुने बताएका थिए ।
यस्तो खुसी देवी मायाले मात्रै व्यक्त गर्नुभएन त्यहाँ आएका अन्य महिलाहरुले पनि आफूहरुका लागि स्थानीय सरकारले ल्याएको निःशुल्क स्वास्थ्य सिविर निकै उपयोगी र सहयोगी भएको बताए ।
रामेछाप नगरपालिका वडा नम्बर ६ घर भई हाल गौरीशंकर माविमा अध्यापन गराउनुहुने शिक्षिका निशा खाड्काले गाउँमै राखिएको स्त्री रोग स्वास्थ्य सिविर गाउँबाट काठमाण्डौ सम्म जान नसक्ने महिलाहरुका लागि निकै उपयोगी भएको बताउनुभयो । उहाँले यस्ता सिविरले महिलाहरुको पाठेघरमा देखिने समस्या, तल्लो पेट दुख्ने लगायतका विभिन्न समस्या कम भई चेतनामा समेत बृद्धि हुने विश्वास व्यक्त गर्नुभयो ।
रामेछाप नगरपालिका र बज्र समाज नेपालको आयोजनामा राखिएको स्त्री रोग स्वास्थ्य सिविरमा तामाकोशी सहकारी अस्पताल मन्थली र जिल्ला अस्पताल रामेछापको समन्वय रहेको छ ।
पहिलो दिन ४२ जनाले लिए सेवा
पहिलो चरणको सिविर अन्तरगत पहिलो दिन बुधबार वडा नम्बर ७, ८ र ९ का महिलालाई लक्षित गरी जिल्ला अस्पतल रामेछापमा राखिएको सिविरमा ४२ जना महिलाले सेवा लिएको रामेछाप नगरपालिकाको स्वास्थ्य शाखाका जनस्वास्थ्य निरिक्षक रामशरण पौडेलले बताउनुभयो । उहाँका अनुसार सिविर विहिबार वडा नम्बर ४ का महिलालाई लक्षित गरी हिमगंगा स्वास्थ्य चौकी बोलङ–बोलङमा राखिएको छ ।
शल्यक्रिया गर्नु पर्ने विरामीलाई नगरपालिकाले सबै खर्च व्यहोर्छः नगर प्रमुख थापा मगर
रामेछाप नगरपालिकाका नगर प्रमुख नर बहादुर थापामगरले नगरभित्रका महिलाको स्वास्थ्य संवेदशिलतालाई मध्यनजर गरी गाउँ–गाउँ लगिएको सिविरमा शल्यक्रियाको लागि छनौट भएका विरामीलाई काठमाण्डौँ आवतजावत लगायत शल्यक्रिया सहितको खर्च नगरले व्यहोर्ने बताउनुभयो । नगर प्रमुख थापामगरले सिविरमा नगरभित्रका सबै महिलालाई सहभागी हुन आग्रह समेत गर्नुभएको छ ।
आर्थिक अभाव र जनचेतना कमीका कारण महिलाहरुले आफ्नो (विषेश गरी यौनागंको नियमित) स्वास्थ्य परिक्षण नगराउँदा भविष्यमा जटिल समस्या आउन सक्ने भएकाले त्यसको निराकणको लागि बज्र समाज नेपालले विगत वर्ष देखिनै गर्दै आएको सिविर यस वर्ष नगरपालिकासँग मिलेर गरेको समाजका अध्यक्ष पुर्ण मगरले बताउनुभयो । यस्ता सिविरले महिलाले भोग्दै आएका पीडा कम हुने अध्यक्ष मगरको दावी रहेको छ ।
शीर मेमोरियल अस्पतालका स्त्री रोग विषेशज्ञ डा. प्रशंशा उलकको नेतृत्वमा रहेको टोलीले पाठेघरको मुखको क्यान्सर जाँच, पाठेघर झरेका महिलाहरुको स्क्रिनिङ तथा उपचार, तल्लो पेट दुख्ने तथा सेतो पानी बग्ने, पिसाव पोल्ते तथा महिनावारी गडबडी हुने, स्तनमा गाँठागुठी देखिने, गर्भवती महिलाहरुको भिडियो एक्सरे लगायतका सेवा उपलब्ध गराउने छ ।
यो बारेमा तपाईको प्रतिकृया