रामेछाप- नेपाली काँग्रेस लिखुतामाकोशी गाउँपालिका वडा नं ६ खिम्तीले महामारीको रुपमा फैलिई रहेको कोरोना भाइरस विरुद्ध स्थानीयको घरमै पुगेर मास्क र साबुन दिँदै जनचेतना जगाउने अभियान चलाएको छ । विश्वभरी हजारौ मानिसको ज्यान लिइसकेको कोरोना भाइरस नेपालमा फैलिन सक्ने भन्दै सरकारले भाइरस नियन्त्रणको लागि लकडाउन लगाएपछि स्थानीय नागरिकलाई लकडाउनको पूर्ण पालना गर्न अनुरोध गर्दै काँग्रेसले घरमै पुगेर सरसफाईमा समेत ध्यान दिन आग्रह गर्दै साबुन र मास्क वितरण गरेको हो ।
गाउँका नागरिकलाई कोरोना भाइरस नियन्त्रणको लागि सरकारले लगाएको लकडाउन र भाइरसबाट बच्ने उपायका बारेमा पूर्ण जानकारी छैन, भिडभाड नगरी आधरभूत जनचेतनाका कुरा सिकाउँदै साबुन र मास्क लिएर गाउँमा गएका हौँ, ‘ इकाई सभापति जहानसिंह खत्रीले भन्नुभयो, यति भए पनि उहाँहरुलाई निकै राहत हुन्छ ।’
खिम्तीका काँग्रेसका सबै तहका नेताहरुको सहयोगमा स्थानीय तहको चुनावमा वडाध्यक्ष पदको उम्मेद्वार समेत बन्नुभएका भुवन कुमार कार्कीको नेतृत्वमा वडाका करिव १२ सय घरपरिवारलाई पुग्ने गरी वितरण गरिएको पनि सभापति खत्रीले बताउनुभयो ।
त्यस्तै वडामा काँग्रेसले राहत कोष स्थापना गरी नागरिकहरुको थप समस्या बुझेर राहत वितरण गर्ने लगायत जनचेतना जगाउने आगामी कार्यक्रम रहेको उहाँको भनाई रहेको छ । महामारीको रुपमा फैलिईरहको कोरोना भाइस नियन्त्रणको लागि लगाईएको लकडाउनलाई मध्यनजर गर्दै दैनिक रुपमा ज्याला मज्दुरी गर्ने श्रमिकहरुलाई एक महिना सम्म खाना खुवाउने व्यवास्थाको लागि वडामा रहेको काँग्रेसका एक कार्यकर्ताले दुई श्रमिकलाई सहयोग गर्ने समेत निर्णय गरिएको इकाई सभापति जहानसिंह खत्रीले बताउनुभयो ।
लिखुतामाकोशी गाउँपालिका वडा नं ६ खिम्तीका प्रत्येक नागरिकका हरेक समस्यासँग जुध्ने गरी नेपाली काँग्रेसले प्याकेजका कार्यक्रम ल्याएर साथ दिने नेपाली काँग्रेस जिल्ला कार्यसमिति सदस्य पदम माझीले प्रतिबद्धता जनाउनुभयो ।
यो बारेमा तपाईको प्रतिकृया