२२ बैशाख, २०७६
रामेछाप– जिल्लाकै पहिलो पर्यटन गन्तब्य गाउँ घोषणा भएको दोरम्बा गाउँपालिका– २ साविकको दोरम्बा गाविस वडा नम्बर ५ पूर्ण सरसफाई उन्मुख घोषणा भएको छ । वडा स्तरीय खानेपानी तथा सरसफई स्वच्छन्दता समन्वय समितिको आयोजनामा आइतबार भएको घोषणा कार्यक्रममा स्थानीय जनप्रतिनिधि, सरोकारवाला निकायका प्रतिनिधि, स्थानीय लगायतले ६ बुँदे घोषणा पत्रमा हस्ताक्षर गर्दै वडालाई चाँडै पूर्ण सरसफाई वडा बनाउने प्रतिबद्धता जनाएका छन् ।
प्रतिबद्धता पत्रमा चर्पीको समुचित प्रयोग गर्ने गराउने छौँ, ब्यक्तिगत सरसफाई गर्ने गराउने छौँ, सुरक्षित पानीमा पहूँच तथा प्रयोग गर्ने गराउने छौँ, सुरक्षित खानाको प्रयोग गर्ने गराउने छौँ, घरायसी एवं संस्थागत सरसफाई गर्ने गराउने छौँ र वातावरणीय सरसफाई गर्ने गराउने छौँ भन्ने पूर्ण सरसफाईका ६ सुचक उल्लेख छन् ।
कार्यक्रममा बोल्दै दोरम्बा गाउँपालिकाका अध्यक्ष कमनसिं मोक्तानले गाउँपालिकाले एक पछि अर्को सफलता प्राप्त गर्दै जानु खुसीको कुरा भएको भन्दै दोरम्बा गाउँपालिकाको वडा नम्बर २ मात्रै नभएर गाउँपालिकालाई नै पूर्ण सरसफाई घोषणा गर्नको लागि सबै लाग्नु पर्नेमा जोड दिनुभएको छ । उहाँले सिंगो गाउँपालिकालाई विकास गर्न पालिकाले कुनै पनि कसर बाँकी नराख्ने प्रतिबद्धता व्यक्त गर्नु भएको छ ।
दोरम्बा गाउँपालिका–२ का वडा अध्यक्ष खड्ग बहादुर श्रेष्ठको अध्यक्षता तथा गाउँपालिकाका अध्यक्ष कमनसिं मोक्तानको प्रमुख आतिथ्यतामा भएको कार्यक्रममा पहाडी समाज कल्याण केन्द्रका अध्यक्ष रत्न कडेल, सबल कार्यक्रम रामेछापका प्रमुख दिल बहादुर नेपाली लगायतको सहभागिता रहेको थियो ।
वडा कार्यालयको आयोजना, पहाडी समाज कल्याण केन्द्रको सहजीकरण र सबल कार्यक्रमको आर्थिक एवं प्राविधि सहयोग उक्त कार्यक्रम सम्पन्न भएको सबल कार्यक्रमका विपद् जोखिम न्यूनिकरण तथा जलवायु परिवर्तन अनुकुलन सुपरभाजर नोर्वु योञ्जनले जानकारी दिनुभयो ।
यो बारेमा तपाईको प्रतिकृया