९ असार, २०७६
रामेछापको सुनापती गाउँपालिकामा वडा अध्यक्षले निजी आवास पुर्ननिर्माणको कार्यका लागि वडामा खटिएका अशिष्टेण्ट सव इन्जिनियरलाई कुटेका छन् । आइतबार राति वडा नं. २ का वडा अध्यक्ष कमल के.सीले अशिष्टेण्ट सव इन्जिनियर हिमाल खड्कालाई कुटेका हुन् ।
सोमबार राती साँढे नौ बजेको समयमा स्थानीय एक होटलमा आफू खाना खाइरहेको बेला भूकम्प पीडित लागि सूचनामूलक सामाग्री आफ्नो अनुमति बिना फेसबुक मार्फत किन सार्वजनिक गरेको भन्दै जाँड खाएको बेला अपशब्द बोल्दै कठालोमा समातेर अनुहारमा निलडाम हुने गरी आफूलाई कुटेको पीडित खड्काले सोमबार साँझा पत्रकार सम्मेलन गरी जानकारी गराएका छन् । पीडित खड्काले जनतालाई सूचित गराउने उदेश्यले उक्त सूचना सार्वजनिक गरेको बताउदै त्यो काम आफूले गर्न नमिल्ने भए कनून बमोजिम कारबाही भोग्न आफू तयार रहेको तर जनप्रतिनिधिको छाडातन्त्रले गर्दा आफूमाथि कुटपिट भएको बताए ।
अध्यक्षलाई कारबाही नभए जिल्ला भरीको सबै काम ठप्प पार्ने चेतावनी
अशिष्टेण्ट सव इन्जिनियर खड्का माथि वडा अध्यक्षको ज्यादती पछि राष्ट्रिय पुर्ननिर्माण प्राधिकरण प्राविधिक सन्जाल रामेछापले विज्ञप्ती जारी गर्दै कुटपिटमा संलग्न वडा अध्यक्षलाई हदै सम्मको कारबाहीको माग गर्दै सोमबार देखि सुनापती गाउँपालिकाको कामकाज ठप्प पार्ने बताएको छ । सन्जालले आफूहरूको माग ७ दिन भित्र पूरा नभए रामेछाप जिल्लाका ८ ओटै स्थानीय तहमा पुर्ननिर्माणको काम ठप्प पार्ने चेतावनी दिएको छ ।
अध्यक्ष के.सी भन्छन् : मुखमुखै लागेकाले एक थप्पर हिर्काएको हो
उता वडा अध्यक्ष के.सीले भने इन्जिनियर खड्काले आइतबार वडा कार्यालयको लेटरप्याडमा भूकम्प पीडितलाई आवश्यक सूचना लेखी आफ्नो नाम लेखेको र त्यसमा तपाइको नाम लेख्न मिल्दैन, वडा कार्यालय २ लेख्नु पथ्र्यो भनेर सम्झाउँदा मुखमुखै लागेकाले एक थप्पर हिर्काएको स्वीकार गरेका छन् । वडा अध्यक्ष के.सी.ले इन्जिनियर खड्का मर्यादा भन्दा माथी गएर काम गरेकै कारण उक्त घटना घटेको दाबी गरे । खड्कालाई आफूले एक थप्पर हिर्काएको स्वीकार गरे पनि जाड खएको भन्ने आरोप झुटो रहेको के.सीको प्रतिक्रिया रहेको छ ।
के.सी तत्कालीन नेकपा-माओवादीबाट अध्यक्षतामा निर्वाचित भएका हुन् ।
बुधबार मात्रै लिखुतामाकोशी गाउँपालिकाका अध्यक्ष गोबिन्द बहादुर खड्काले शिक्षक माथि हातपात गरेका थिए । उक्त घटनाको एक हप्ता बित्न नपाउँदै फेरि वडा अध्यक्षबाट प्राविधिक कुटिएका छन् ।
यो बारेमा तपाईको प्रतिकृया