रामेछाप २८ भदौ । मन्थली नगरपालिका वडा नं १ को भैसेश्वर स्थित चन्द्रशेखरेश्वर मन्दिर प्राङ्गणमा लगाइएको श्रीमद् भागवत पुराण निर्विवाद तरिकाले सकिएको छ । भदौ २० देखि २७ गते सम्म श्रीमद्भागवत सप्ताह ज्ञान महायज्ञ मूल समारोह समिति शिव शक्ति कल्याणी आश्रम योग ध्यान केन्द्रको आयोजनामा उक्त ज्ञान महायज्ञ लगाइएको हो ।
श्री शिव शक्ति कल्याणी केन्द्र मन्थलीकी प्रमुख सरस्वती घिमिरे समेतको अगुवाइमा आयोजना गरिएको उक्त ज्ञान महायज्ञमा कथा वाचनका लागि वृन्दावन धामका पण्डित ,बौद्धिक व्यक्तित्व प्रखर कथा वाचक राधा शरण महाराज लाई आमन्त्रण गरिएको थियो । सात दिन सम्म लगाइएको सप्ताह महायज्ञमा दैनिक ठुलो सङ्ख्यामा भक्तजनहरू सहभागी भएर रुचिपूर्वक कथा श्रवण गरेका थिए । कथा वाचनका क्रममा सांस्कृतिक टोलीको पनि उत्कृष्ट प्रस्तुति रहेको थियो भने स्थानीयहरूले पनि कार्यक्रममा साथ दिएका थिए ।
कसै सँगै अनिवार्य चन्दा तथा सहयोग समेत आव्हान नगरी लगाइएको भए पनि सप्ताह महायज्ञमा भक्तजनहरूबाट स्वतःस्फूर्त रूपमा पौने २ लाख रुपैयाँ जति सहयोग र भेटी रकम उठेको थियो । सप्ताह सुरु हुनु अघि अधिकांश मानिसहरू सकारात्मक नभएको भए पनि समापनको दिन सम्म पाएको सबैको सहयोग र समर्थनले मूल आयोजक पक्ष पनि उत्साहित भएको थियो ।
कथा पारायण तथा उप वाचक भने मूल आयोजक समितिका अध्यक्ष पण्डित योगेन्द्र राज न्यौपाने रहनु भएको थियो । उहाँले कथा वाचक पण्डित राधा शरण महाराज सँगै रहेर कथा पारायण गर्नु भएको थियो । आम नागरिक तथा भक्तजनहरूको उल्लेख्य सहभागिताका बिचमा समापन भएको सप्ताहका क्रममा कथा वाचनका क्रममा मन्थलीमा आएका पण्डित मध्य सबै भन्दा विद्धान र सिद्धहस्त पण्डित भएको र सप्ताह पनि उत्कृष्ट र कर्णपृय रहेको स्थानीय हरुले बताएका छन् ।
यो बारेमा तपाईको प्रतिकृया