रामेछाप ८ मङ्सिर । जिल्लाको सुनापति गाउँपालिकाले पहिलो चौमासिक कार्यक्रमको समीक्षा गरेको छ । शुक्रवार उसले स्थानीयहरूको अलावा जिल्लाका सरोकारवालाहरू समेतलाई उपस्थित गराएर पहिलो चालु आर्थिक वर्ष २०८१÷०८२ को समीक्षा गरेको हो । सो अवसरमा
उसले वडा नं २को बेथान स्थित वडा कार्यालयमा सार्वजनिक सुनुवाइ कार्यक्रम मार्फत चालु आवको चार महिनामा जम्मा बजेटको १२.८३ प्रतिशत मात्रै खर्च गर्न सकेको जानकारी गराएको छ ।
गाउँपालिकाका प्रमुख प्रशासकीय अधिकृत सुरेश कुमार श्रेष्ठले चालु आर्थिक वर्षको साउनदेखि कात्तिक महिनासम्मको प्रगति विवरण पेस गर्दे पालिकामा जम्मा ५६ करोड ९० लाख ५२ हजार रुपैयाँ रहेकोमा चार महिनाको अवधिमा १२.८३ प्रतिशत अर्थात् ७ करोड ३ लाख ४१ हजार १६४.७७ पैसा खर्च गरेको जानकारी गराउनु भएको थियो ।
त्यसैगरि प्रमुख प्रशासकीय अधिकृत श्रेष्ठ द्वारा प्रस्तुत प्रतिवेदनमा यो अवधिसम्म आई पुग्दा चालु तर्फ ३७ करोड ५९ खाल १५ हजार ८०० रुपैयाँ बजेट रहेकोमा १८.४४ प्रतिशत अर्थात् ६ करोड ९३ खाल २७ हजार ९१६.७७ रुपैयाँ बजेट खर्च भएको छ । त्यसै गरी पुँजीगत तर्फ १९ करोड ३१ लाख ३६ हजार २०० रुपियाँ बजेट रहेकोमा १.९२ प्रतिशत अर्थात् ३७ लाख १३ हजार २४८ रुपियाँ बजेट खर्च भएको कुरा उल्लेख गरिएको छ । यो वर्ष गाउँपालिकाले ४५ लाख रुपैयाँ आन्तरिक आम्दानी गर्ने लक्ष्य लिएकोमा पहिलो चौमासिकसम्म लक्ष्यको २९.८८ प्रतिशत अर्थात् १३ लाख ४४ हजार ६००२ रुपैयाँ आम्दानी गर्न सफल भएको जानकारी पनि सो अवसरमा गराइएको थियो ।
चालु आर्थिक वर्ष २०८१÷०८२ मा ७५ वटा भन्दा बढी योजनाहरू उपभोक्ता समिति मार्फत सम्पन्न हुनुपर्नेमा कात्तिक मसान्तसम्म ३२ वटा योजनाको उपभोक्ता समिति बनेका र २ वटा योजनाकोमात्र सम्झौता भएको जानकारी प्रमुख प्रशासकीय अधिकृत श्रेष्ठले आफ्नो प्रगति विवरणमा उल्लेख गर्नु भएको छ ।
कार्यक्रममा सहभागीहरूको सङ्ख्या उल्लेख्य रूपमा रहेको भए पनि अडियो रेकडबाट स्थानीय हरूले बोलेको आवाज र रास्वपाका पालिका प्रतिनिधि लगायतका वक्ताहरूले शिक्षा, स्वास्थ्य, सडक पूर्वाधार, महिला विकास र कृषि क्षेत्रको विकासमा पालिकाले गरेको र गर्ने कार्यक्रमको बारेमा कुरा उठान गरेका थिए ।
सार्वजनिक सुनुवाइ कार्यक्रमको जबाफदेही वक्ताका रूपमा गाउँपालिका अध्यक्ष ठुलो कान्छा तामाङ, उपाध्यक्ष गीता विष्ट, प्रमुख प्रशासकीय अधिकृत सुरेश कुमार श्रेष्ठ र वडा अध्यक्षहरूले सहभागिता जनाउनु भएको थियो ।
सो अवसरमा गाउँपालिका अध्यक्ष तामाङले समृद्ध र सुखी सुनापति ः कृषि पर्यटन हाम्रो सम्पत्ति भन्ने नारालाई साकार पार्ने अभियानमा पालिकाको पुरा टिम लागेको भन्दै यसका लागि सबैको सहयोग आवश्यक रहेको बताउनु भएको थियो । उहाँले सार्वजनिक सुनुवाइ कार्यक्रममा नागरिकहरूबाट पाएको हार्दिकता र मायाले पालिकाको विकास र सुशासनको कार्यान्वयनमा आफूहरूलाई उत्साहित बनाएको बताउनु भयो । उहाँले यसका लागि आफूले कसै सँगै पनि सम्झौता गर्न नसक्ने भन्दै सङ्घीय मामिला तथा सामान्य प्रशासन मन्त्रालयको गुणस्तर परीक्षण नतिजा अनुसार स्थानीय तह संस्थागत क्षमता स्वमूल्याङ्कनमा रामेछापका आठ पालिकामध्ये सुनापति गाउँपालिका दोस्रो स्थानमा रहेबाट पनि सो कुरलाई पुष्टि गरेको जानकारी गराउनु भएको थियो ।
प्रहार मिडिया प्रालि रामेछापको सहजिकरणमा चालु आर्थिक वर्षको पहिलो चौमासिकसम्म गाउँपालिकाबाट सञ्चालन भएका विकास निर्माण, सेवा प्रवाह लगायतका विषयमा सार्वजनिक सुनुवाइ कार्यक्रम सँचालन गरिएको हो । दिनभर जस्तै चलेको सार्वजनिक सुनुवाइ कार्यक्रममा सहभागी हरूले भने सेवाका क्रममा स्थानीय जन प्रतिनिधिहरूबाट सेवाका क्रममा कुनै पनि कमी र कमजोरीका सवालहरूमा भने कुरा उठाएनन् ।
यो बारेमा तपाईको प्रतिकृया