रामेछाप, ८ मङ्सिर । रामेछाप नगरपालिकाकी उप–प्रमुख वाल कुमारी कार्कीको नेतृत्वमा रामेछाप नगरपालिका वडा नं ८को विटारमा रहेको विटार पार्कको सरसफाई गरिएको छ ।
पार्कमा घाँस र झाडी भरिएका कारण पार्क घुम्न आउने हरूलाई असहज भएको गुनासो आउन थालेको भन्दै उप–प्रमुख कार्कीको अनुरोधमा शनिवार बिहानै पार्कमा भेला भएका रामेछाप नगरपालिका वडा नं ८ का वडा अध्यक्ष सन्तोष कुमार तामाङ सहित पार्क व्यवस्थापन समितिका पदाधिकारी र स्थानीयको संयुक्त प्रयासमा विटार पार्कको सरसफाई गरिएको हो ।
आन्तरिक पर्यटकहरुको आगमन बढे सँगै विटार पार्कलाई नमुना पार्कको रुपमा विकास गर्नु पर्ने माग सर्वत्र उठ्दै आएको थियो । सोही मागका आधारमा पार्क व्यवस्थापन समिति र स्थानीयहरूको समेत चासो बढेपछि रामेछाप नगर पालिकाले उक्त पार्कको व्यवस्थापनमा चासो बढाएको छ । जस अनुरूप उप–प्रमुख कार्कीको अगुवाइमा चालु आवमा १० लाख रुपैयाँ विनियोजन भएको थियो । जुन बजेटलाई पनि पार्क व्यवस्थापनमा खर्च गर्ने तयारी समितिले गरेको छ ।
सदरमुकाम मन्थली बजार वाट ३ किलो मिटर टाढा भएकोले उक्त पार्कको अवलोकन र मनोरञ्जनका लागि मन्थली बजार वाट दैनिक दर्जनौँको सङ्ख्यामा आन्तरिक पर्यटकहरू पार्कमा जाने गरेकाले पनि पछिल्लो समयमा उक्त पार्कको महत्त्व बढेको पार्क व्यवस्थापन समितिका अध्यक्ष सुनिल कुमार रायले बताउनुभयो ।
रामेछाप नगरपालिका वाट १० किलो मिटरको दुरीमा रहेको विटार पार्कको निर्माण सँगै यसको उचित व्यवस्थापन गर्न सके उक्त पार्कमा आन्तरिक मात्र नभएर बाह्य पर्यटकहरुको आगमन समेत बढ्न सक्ने रामेछाप नगरपालिकाकी उप–प्रमुख कार्किले जानकारी दिनुभयो ।उहाँले भन्नु भयो – “ पार्कको विकासको लागि नगरपालिकाले आवश्यक सहयोग गर्नु पर्छ भन्ने मान्यता नगरले पनि राखेको छ ।”
पार्कको स्तरोन्नति र थप व्यवस्थापनका लागि नगरपालिकाले महत्वका साथ ध्यान दिनु पर्ने वडा अध्यक्ष सन्तोष कुमार तामाङले बताउनु भयो । पार्कको थप सरसफाइ र भावी कार्य योजना निर्माण गर्नका लागि व्यवस्थापन समितिले उप–प्रमुख कार्कीकै अनुरोधमा आगामी शनिवार पार्क क्षेत्र भित्रै बसेर मैत्रीपूर्ण बैठक गर्ने सहमति भएको पार्क व्यवस्थापन समितिका सदस्य एवं स्थानीय अगुवा नारायण प्रसाद घिमिरेले जानकारी दिनुभयो ।
यो बारेमा तपाईको प्रतिकृया