रामेछाप मालपोतमा पनि अनलाइन सेवा सुरु

२० भदौ, २०७६

मन्थली- मालपोत कार्यालय रामेछापले आफ्नो सेवा अनलाईन मार्फत दिन सुरु गरेको छ । सेवाग्राहीको चापलाई ध्यानमा राखेर बद्लिदो समयसँगै नागरिकहरुलाई सेवा प्रवाहको क्रममा झंझटिलो प्रक्रियाबाट मुक्ति दिलाउन र कार्यालयका कामहरुलाई ब्यवस्थित बनाउनका लागि अनलाईन सेवा सुरु गरिएको हो ।

शुक्रबार मलपोत कार्यालयका प्रमुख रघुनाथ फुयालको अध्यक्षतामा भएको कार्यक्रममा मन्थली नगरपालिकाका प्रमुख रमेश कुमार बस्नेतले व्यानर अनावरण गरेर अनलाईन सेवाको आरम्भ भएको जानकारी गराउनु भएको हो । कार्यक्रममा बोल्दै नगर प्रमुख बस्नेतले मालपोत कार्यालयले अनलाईन मार्फत सेवा सञ्चालन गर्दा लेखापढी ब्यवसायिहरुले परम्परागत तरिकाले काम गर्न नसक्ने भएपनि उनिहरुले दक्ष भई कम्प्युटर वा ल्यापटप मार्फत सेवाग्राहीलाई सहयोग गर्न सक्ने बताउनुभयो । प्रमुख जिल्ला अधिकारी लिला कुमारी केसी पाण्डेले अनलाईन सेवाका लागि कर्मचारीहरुको क्षमता अभिबृद्धि गरिनु पर्ने बताउनु भयो । उहाँले जनताको काम छिटो छरितो र पारदर्शि ढंगबाट गर्न सके मालपोतको काम सुशासन मुखी हुने र श्रेष्ता ब्यवस्थीत समेत हुने हुँदा यसलाई अझ प्रभावकारी बनाउनुपर्ने जोड दिनुभयो ।

कार्यक्रममा बोल्दै नेपाल पत्रकार महासंघका अध्यक्ष रमेश ढुंगेलले अनलाईन सेवाले मालपोत कार्यालयमा हुने गरेको परम्परागत कार्यशैलीलाई परिबर्तन गरेको बताउनुभयो । उहाँले मालपोत कार्यालयले अझ ब्यवस्थित एबं छिटो छरितो ढंगबाट सेवा दिनेगरी काम गर्नु पर्ने बताउनुभयो । अध्यक्ष ढुंगेलले अब चाडै नै नापी कार्यालमा पनि अनलाईनबाट सेवा दिने व्यबस्था मिलाउनु पर्ने बताउँदै सर्भर बिग्रेका कारण काम नभएर सेवाग्राही हैरानी भएको समाचार लेख्नुपर्ने अबस्था सृजना नबन्नेमा आफू बिश्वस्त रहेको बताउनुभयोे ।
मुलुकभरका १ सय ३० वटा मालपोत कार्यालय मध्ये रामेछाप मालपोत अनलाईन बाट सेवा सुरु गर्ने ८८ औं कार्यालय भएको जानकारी मालपोत कार्यालय रामेछापका प्रमुख रघुनाथ फुयालले बताउनुभयो । उहाँले नागरिकहरुलाई सहज ढंगबाट सेवा प्रबाह गर्न मालपोत कार्यालय सधै तयार रहेको बताउनुभयो ।

कार्यक्रममा भू–सूचना प्रणली मार्फत सुरु भएको अनलाइन सेवाको सबै बिबरण बिभाग र मन्त्रालयमा हुने भएकोले यसमा ह्याक हुने गोपनियता नष्ट हुने जस्ता कृयाकलापहरु हुनै नसक्ने केन्द्रिय कम्प्युटर अधिकृत हिरा गोपाल महर्जनले दाबी गर्नुभयो । उहाँले सेवाग्राहीरुलाई सुरु सुरुमा यो प्रणाली झण्झटिलो जस्तो लाग्ने भएपनि पछि निक्कै सजिलो भएको महसुस हुने बताउनुभयो ।
जनतासँग प्रत्यक्ष सरोकार राख्ने सरकारी कार्यालयहरु मध्ये सबै भन्दा झन्झटिलो प्रक्रिया व्यहोर्नु पर्ने मालपोत कार्यालयमा अनलाईन सेवाको आरम्भ भए सँगै सेवाग्राहीहरुले पनि सजिलै र समयमानै काम तामेली गर्न सक्ने अवस्था सृजना भएको कार्यालयका नायब सुब्बा दामोदर सुवेदीले बताउनुभयो । कार्यक्रमका अबसरमा अनलाईन सेवा मार्फत तयार भएको लालपुर्जा पहिलो सेवाग्राहिलाई हस्तान्तरण समेत गरिएको थियो ।