पूर्वाधार कार्यालयको गाडीले ठक्कर दिदाँ एकको मृत्यु, एक घाईते

मन्थली- पूर्वाधार विकास कार्यालय रामेछापको गाडीले ठक्कर दिदाँ एक जनाको ज्यान गएको छ भने एक जना घाईते भएका छन् । सिन्धुलीको गोलञ्जोर– ६ देउरालीटारमा प्रदेश ३–०१००२ झ ४६९९ नम्बरको सरकारी गाडीले ठक्कर दिदाँ रामेछाप नगरपालिका वडा नम्बर ७ का शिव बहादुर कार्कीको दुर्घटना स्थलमै ज्यान गएको हो । त्यस्तै गाडीको ठक्करबाट सिन्धुपालञ्चोकका कमल खड्का घाइते भएका छन् । घाइते खड्कालाई उपाचारको लागि कठमाण्डौ लगिएको छ ।

शुक्रबार राती साँढे ८ बजेको समयमा वाक्सुखोलाको साइट हेरेर मन्थली फर्कदै गरेको गाडी सडकमा चिप्लिएर कार्कीलाई ठक्कर दिदाँ उनको मृत्यु भएको इलाका प्रहरी कार्यालय खुर्कोटले बताएको छ । इलाका प्रहरी कार्यालय खुर्कोटका प्रहरी नीरिक्षक विरेन्द्र घिमिरेका अनुसार मृतक कार्की पनि सुमो चालक भएकाले उनको गाडी सडकमा चिप्लिएको थियो । सुमो किन चिप्लियो भनेर सुमो रोकेर हेरेर फर्कदै गर्दा पूर्वाधारको गाडी पनि त्यसैगरी चिप्लिएर उनलाई ठक्कर दिएको हो । ठक्कर दिने सवारी र सवारी चालकलाई प्रहरीले नियन्त्रणमा लिएर थप अनुसन्धन भईरहेको प्रहरी नीरिक्षक घिमिरेले बताउनुभयो ।