पकरवासमा भ्यूटावर !

रामेछाप, १० पुष । रामेछाप जिल्लाको खँडादेवी गाउपालिका वडा नं–५ को पकरवास स्थित सुलिथुम्का डाँडामा भ्यूटावर निर्माणका लागि शुक्रवार शिलान्यास गरिएको छ ।

जिल्ला समन्वय समितिका प्रमुख प्रेम बहादुर खड्का र खँडादेवी गाँउपालिका अध्यक्ष प्रेम बहादुर तमाङले संयुक्त रुपमा उक्त भ्यूटावरको शिलान्यास गर्नु भएको हो । कार्यक्रमका अवसरमा बोल्दै गाँउपालिका अध्यक्ष प्रेम तमाङले यो टावर निर्माण भएपछि यहाँवाट रामेछाप,दोलखा,सिन्धुली र काभ्रे जिल्लाका अधिकांस भागहरुको दृश्यावलोकन गर्न सकिने भएकाले गाँउपालिकाको प्रमुख पर्यटकिय केन्द्रबिन्दु बन्ने अपेक्षा गर्नुभयो । उहाँले निर्धारित समयमै काम गर्न निर्माण ब्यवसायिलाई अनुरोध गर्दै निर्माणका लागि आबश्यक सहयोग पालिकाको तर्फबाट पूर्ण रुपले हुने वताउनुभयो ।
कायक्रमका प्रमुख अतिथि एवं जिल्ला समन्वय समितिका प्रमुख प्रेम बहादुर खड्काले यस्ता भ्यूटावरहरूले जिल्लामा पर्यटकहरु आकर्षण गर्ने र पालिकाको आयस्रोत समेत बृद्धि गर्ने हुँदा यस्ताखालका योजनाहरु अन्य पालिकाहरुमा पनि हुनुपर्ने कुरालाई जोड दिनुभयो ।

वागमति प्रदेश सरकारको आर्थिक सहयोगमा सुनकोशी कन्ट्रक्सनले यहि २०७८ जेठ महिनाको १५ गत सम्पन्न गर्ने गरी रु २ करोड ८९ लाख ६३ हजार ७ सय ७२ रुपैयाको लागतमा ९ सय ५० मिटर सिडि (खुड्कीला) सहित ५ तले भ्यू टावर र शौचालय निर्माण गर्ने गरी सम्झौता गरेको छ ।